Díli, 16/11/2023. Vise-Preziente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, akompaña hosi Diretór Operasaun no Manutensaun (DOM) partisipa iha workshop WhoDoesWhat ou “Se Mak Halo Saida” ne’ebé realiza hosi WaterAid Timor-Leste, iha Otél Villa-Verde, Díli.
Objetivu hosi workshop ne’e, WaterAid Timor-Leste ho apoiu hosi WaterAid Austrália hakarak promove diskusaun ho parseiru estratéjiku no grupu interesadu sira hosi nasionál no munisípiu, hodi hamosu buat barak no foun atu ajuda halo reflesaun ruma durante tinan lima ho IX governu konstitusionál atu oinsá mak bele fó prioridade hodi haree ba iha setór bee moos seguru, saneamentu no ijiene (BESI) nian.
Iha biban ne’e, Vise-Preziente KE BTL, E.P ba Asuntu Sistema Bee, Saneamentu no Drenajen hato’o ou partilla mos informasaun kona-bá ezisténsia no papel BTL, E.P nian, ne’ebé hanesan empreza públika iha autonomia tomak hodi jere sistema bee, saneamentu iha territóriu nasionál.
Alende ne’e, reprezentante Sekretáriu Estadu Eletrisidade, Bee no Saneamentu (SEEAS, sigla portugés) hato’o mos S.E SEEAS nia mensajen kona-bá polítika IX governu konstitusionál nian ba iha setór bee, saneamentu no ijiene iha Timor-Leste
Durante iha workshop ne’e, iha mos diskusaun kada grupu kona-bá knaar no papel tuir prátika. Partisipante sira mai hosi SEEAS, BTL, E.P, SMASA, DNRAS, ONG internasionál no lokál inklui sosiedade sivil no seluk tan.
Fahe ba Sosial Media:
