𝐃𝐢́𝐥𝐢, 𝐓𝐞𝐫𝐬𝐚-𝐟𝐞𝐢𝐫𝐚 𝟐𝟖 𝐉𝐮𝐥𝐥𝐮 𝟐𝟎𝟐𝟔.
Vise-Prezidente KE BTL, E.P ba Asuntu Tékniku, José Filipe Ximenes Smith, akompaña hosi Jestór SOM no Ofisiál Tékniku DCQA BTL, E.P, partisipa iha Konsultasaun Téknika no Validasaun Finál Nível Nasionál kona-bá Proposta Dekretu Lei ba Fortifikasaun Ai-han (Esbosu finál), ne’ebé organiza hosi Ministériu Komérsiu no Indústria (MTI) liuhosi Unidade Misaun ba Kombate 𝑆𝑡𝑢𝑛𝑡𝑖𝑛𝑔 (UNMICS, sigla portugés) ho kooperasaun servisu ho entidade relevante sira nomos kolaborasaun hosi Ajénsia 𝑊𝑜𝑟𝑙𝑑 𝐹𝑜𝑜𝑑 𝑃𝑟𝑜𝑔𝑟𝑎𝑚𝑚𝑒 (WFP) Timor-Leste. Sorumutu ne’e, realiza iha sala reuniaun SEIJ, Caicoli.
Enkontru Konsultasaun Téknika no Validasaun Finál ne’e, atu aprezenta fundamentu tékniku no konteúdu prinsipál hosi proposta Dekretu Lei ba Fortifikasaun Ai-han, hodi rekolla komentáriu no rekomendasaun finál hosi parte interesada sira kona-bá implementasaun, kapasidade institusionál, setór privadu no mekanizmu regulatóriu relevante sira nomos atu hametin koordenasaun no kolaborasaun mulsetoriál hodi apoia implementasaun efetivu hosi Dekretu Lei refere iha futuru. Nune’e ho partisipasaun no kontribuisaun hosi parte interesada sira, atu garante katak Lei ne’e prátika, efikáz, inkluzivu no sustentável ba implementasaun iha futuru.
Kriasaun Dekretu Lei ne’e, nudár polítika no intervensaun Governu nian ne’ebé adekuadu, hodi responde ba problema má-nutrisaun no inseguransa ai-han ne’ebé nafatin sai hanesan dezafiu boot ba saúde públika no dezenvolvimentu iha Timor-Leste, iha ne’ebé fó impaktu direta ba saúde, kresimentu no dezenvolvimentu labarik sira nomos ba produtividade no bem-estar populasaun tomak.
Konsultasaun téknika no validasaun finál ne’e, lidera hosi Ministru Komérsiu no Indústria (MTI) no partisipa hosi Ajénsia Autónoma, kargu xefia hosi Ministériu relevante sira, ajénsia internasionál, setór privadu, sosiedade sivil no partisipante esensiál sira seluk.
Fahe ba Sosial Media:
