Dili , 09 Outobru 2026 - Diretór Operasaun no Manutensaun BTL,E.P Aleixo Dos Santos,ho funsionáriu balun,Partisipa iha workshop Nasional ne’ebé organiza husi Governu liu husi Sekretáriu Estadu Protesaun Civil (SEPC ) no instituisaun estadu inklui parseiru internasional, balun hodi koalia kona-ba Redusaun Risku Dezastre Naturais ne’ebé akontese iha Timor-Leste.
Governu hamutuk ho parseira internasionál, realiza workshop nasionál ne’e hodi Komemora Loron Mundial Redusaun Risku Dezastre Naturais,ne’ebé sei selebra iha loron 13 fulan outobru tinan ne’e iha Timor-Leste.
Relizasaun workshop Nasionál ne’e parte ida atu partila mós informasaun kona-ba preparasaun no planu hodi prepara hasoru iklima bailoron naruk ne’ebé sei akontese iha tempu besik iha timor leste.
Workshop Nasionál ne’e halo iha Hotel Timor sesta semana ne’e.
Durante workshop ne’e ekipa husi Instituto Giografia Timor-Leste (IGTL) ho Diresaun Nasionál Meterologia no Giofisika (DNMG) aprezenta mós rezultadu peskiza kona-ba dadus ne’ebe ekipa sira foti liga ba redusaun risku dezastre naturais iha timor-leste ne’ebé foin dadauk akontese rai halai iha aldeia Ila Suku Belekasak Postu-Administrativu Maucatar Munisipiu Covalima.
Iha parte seluk Diresaun Nasionál Reguladór Agua no Saneamentu (DNRAS) aprezenta mós dadus kona-ba rekursu bee iha rai okos ne’ebé menus tanba impaktu husi iklima bailoron naruk iha timor-leste.
Depois de halo aprezentasaun dadus Instituto Giografia Timor-Leste (IGTL) ho Diresaun Nasionál Meterologia no Giofisika (DNMG) nomos Diresaun Nasionál Reguladór Agua no Saneamentu (DNRAS) rekomenda ba Autoridade Lokal no komunidade sira atu labele tesi-ai no sunu rai hodi fó risku ba dezastre naturais.
Partisipa iha Workshop ne’e reprezentante Gabineti Prezidente Republika.Governu Sosiedade Civil no parseiru Internasionál nomos instituisaun relevante sira seluk.
Fahe ba Sosial Media:
