Númeru populasaun iha kapitál Díli aumenta, nune’e nesesidade ba uzu bee mos aumenta, tamba ne’e, komunidade balun iha sidade Díli seidauk bele asesu ba bee moos, ho nune’e, Bee Timor-Leste, Empreza Públika (BTL, E.P) kontinua esforsu hodi responde ba preokupasaun hirak ne’e, liuhosi halo reparasaun ou melloramentu emerjénsia ba projetu sistema bee, hodi reforsa distribuisaun bee ba komunidade sira iha kapitál Díli, hanesan projetu melloramentu ba intake Tohumeta no Bee Moos inklui kanu transmisaun sira.
Atu responde ba komunidade iha kapitál Díli sira-nia preokupasaun liu-liu kona-bá bee moos, mak daudaun ne’e, BTL, E.P Hetan ona suporta orsamentu hosi Governo Austrália liuhosi parseiru DFAT/PARTISIPA hodi hala’o projetu melloramentu ba Sistema Transmisaun iha sesaun I no 2 iha intake Tohumeta, hodi kanaliza bee mai kapitál Díli. Projetu ne’e hahú iha fulan Outubru tinan 2021 no pauza oitoan iha fulan Dezembru tinan 2021 to’o fulan Maiu tinan 2022 ne’e, tamba kestaun mudansa klimátika no obra refere hahú fila-fali iha fulan Juñu tinan 2022, ne’ebé daudaun ne’e, projetu fíziku la’o hela, tuir planu, projetu melloramentu sistema bee moos ne’e, sei finaliza iha finál fulan Outubru tinan 2022 ne’e.
Iha mos pakote rehabilitasaun/melloramentu ba sistema transmisaun hosi Mutudare, Lacoto nian, sei iha hela faze konstrusaun no tuir planu, obra ne’e sei remata iha fulan Novembru tinan 2022 ne’e. Enkuantu orsamentu hodi finansia ba projetu melloramentu pakote rua ne’e, apoia hosi Governu Austrália ho montante hamutuk Dollar Australianu millaun 6 ($ 6 millaun) no obra ne’e rasik implementa hosi kompañia RMS.
Alende ne’e, Governu Timor-Leste aloka mos orsamentu ho montante $ 304,101.74, ne’ebé foti hosi Fundu Infraestrutura (FI), iha tinan 2022 ne’e, hodi halo melloramentu sistema transmisaun iha parte sesaun 3 nian, hodi liga ba transmisaun ezistente iha Casnafar, atu kanaliza mai iha WTP Bee Moos, ne’ebé lokaliza iha Manleuana. BTL, E.P nia esforsu hirak ne’e hotu, fasilita komunidade sira iha Kapitál Díli bele asesu ba bee moos ho di’ak.
Enkuantu rekursu bee ne’ebé durante ne’e fornese ba komunidade iha Díli, mak kanalizasaun hosi bee matan ou superfísie tolu no perfurasaun bee (subterráneo) ho bomba 26, maibé nesesidade ba uzu aumenta, nune’e labele kobre hotu, tamba ne’e, BTL, E.P esforsu hodi kontinua implementa projetu melloramentu emerjénsia sira hanesan, projetu reparasaun emerjénsia ba sistema bee iha sesaun I, II no III ne’ebé obra fíziku la’o hela iha terrenu, hodi reforsa tan rekursu sistema bee ne’ebé antes ne’e eziste ona, nune’e bele hatan ba populasaun sira-nia preokupasaun durante ne’e, liu-liu komunidade sira iha kapitál Díli.
Alende ne’e, BTL, E.P mos iha projetu perfurasaun emerjénsia lima ne’ebé ho orsamentu hamutuk Dolar Amerikanu $ 258,534.23 mai hosi Fundu Infraestrutura (FI), hodi suporta sistema bee ne’ebé eziste ona iha Díli, hodi garante fornesimentu bee ba komunidade sira. Projetu hirak ne’e, balun implementa hela no balun iha ona faze estudu jeoelétriku. Alende ne’e, BTL, E.P mos planeia ona atu aumenta tan bomba rua, iha kapitál Díli, hodi refora tan bomba 26 ne’ebé eziste ona. Projetu Emerjénsia la’os de’it iha Díli, maibé iha mos munisípiu Manatuto, kona-bá Emergency Supply and Gabion Water for Transmition Pipeline, projetu ne’e iha hela faze konstrusaun no orsamentu mai hosi Fundu Infraestrutura (FI), ho montante $ 127,786.80.
Alende ne’e, esforsu BTL, E.P nia ba kurtu prazu kona-bá projetu melloramentu emerjénsia sistema bee moos ba kapitál Díli, BTL, E.P mos iha planu kona-bá Dili Urban Capital Water Supply Project ne’ebé daudaun ne’e, iha ona faze Dezeñu Detalladu (Detail Engineering Design-DED) ho pursentu 90 (progress of DED 90%) ba Dili Leste no Oeste ne’ebé sei benefisia ba uma kain 68,991 ho nia populasaun 382, 910. No tuir planu sei implementa iha tinan 2023-2029.
Projetu refere hetan fundus ne’ebé ho karákter empréstimu hosi Banku Mundiál (WB, sigla inglés), ho montante Dolar Amerikanu $ 121 milloens, enkuantu hosi Banku Dezenvolvimentu Aziátiku (ADB, sigla inglés) hamutuk Dolar Amerikanu $ 127 milloens. Alende ne’e Governu Timor-Leste (GovTL) aloka mos fundus balun hosi Orsamentu Jerál Estadu (OJE), hodi finansia ba Dili Urban Capital Water Supply Project.
BTL, E.P rekoñese komunidade iha kapitál Díli, komunidade balun seidauk asesu ba bee maibé iha populasaun balun mos asesu ona ba bee moos, tamba ne’e, BTL, E.P nafatin esforsu hodi fornese bee ba populasaun iha Díli, maske sei liuhosi prosesu lubuk ida, maibé daudaun ne’e, BTL, E.P kontinua implementa projetu melloramentu emerjénsia sira, hodi hatan ba komunidade sira-nia preokupasaun sira kona-bá bee moos.
| Dokumentu Adisional husi : Diresaun Enjeñaria no Investimentu | ||||
| No | Naran Dokumentus | Download | ||
|---|---|---|---|---|
| 1 | BTL, E.P Kontinua Esforsu hodi Garante Fornesimentu Bee ba Komunidade sira iha Díli ba Kurtu Prazu |  |
||
