Bem-vindu ba estimadu leitór sira,
Onra boot ida mai ha’u hodi asume kna’ar nu’udár Prezidente Konsellu Administrasaun BTL, E.P nomos Prezidente Komisaun Ezekutiva BTL, E.P hodi lidera empreza públika ida ne’e.
Liuhusi meius ida ne’e permite ha’u atu hato’o lia menon, kona-bá papel esensiál empreza BTL nian.
BTL, E.P nudár empreza estatál ne’ebé harii bazeia ba Dekretu Lei nú. 41/2020 loron 25 fulan Setembru kona-bá kriasaun Empreza Públika Bee Timor-Leste (BTL, E.P). No Projetu Dekretu Lei ba estabelesimentu Empreza Públika Bee Timor-Leste no Respetivu Estatutu sira ne’e, aprova hosi Konsellu Ministrus iha loron 01 fulan Abril tinan 2020 no Promulga iha loron 20 fulan Jullu tinan 2020.
Ezisténsia Empreza Públika ne’e ho nia vizaun ida, hakarak sai empreza públika ba bee no sanementu ida ne’ebé exelente. No nia misaun mak hodi aumenta asesu universál no ekitativa ba servisu bee moos no saneamentu ba populasaun hotu iha teritóriu nasionál, mantein servisu regulár, kontinua no efisiente ba abastesimentu bee no saneamentu, promove servisu asesivu sira bee no saneamentu nian hodi bele kontribui ba dezenvolvimentu ekonómiku, sosiál, ambientál no teknolójiku, ikus nian mak hodi hadi’a saúde públika no promove dezenvolvimentu industriál, komersiál no peskiza.
Relativamente ba vizaun no misaun ne’ebé iha, mak ezisténsia BTL, E.P atu serví no liberta povu iha territóriu nasionál, liuhosi setór bee, saneamentu no drenajen, bazeia ba PEDN 2011-2030 ho nia finalidade katak, populasaun hotu-hotu bele hetan benefísiu hosi servisu BTL, E.P nian.
BTL, EP iha ona página website ne’ebé konsidera hanesan meius komunikasaun ida ne’ebé komum, hodi sosializa no bele transmite informasaun relevante sira ba sosiedade hotu-hotu, ligadu ho esforsu Governu ou Estadu nian ne’ebé investe iha dezenvolvimentu setór bee, saneamentu no drenajen.
Hein katak leitór sira bele hetan informasaun valioza iha website ida ne’e no bele responde ba leitór sira-nia nesesidade ba asesu informasaun sira relasiona ho servisu BTL, E.P nian.
Obrigadu wa’in
Modalidade ne’ebé maka sai hanesan xavi no fatór importante no determinante, atu fó susesu ba servisu sira empreza nain maka fatór rekursu umanu. Basá iha arreadores jurídiku empreza, nia ema sira maka sei ko’alia, diskute, propoin no impoin, planu, ideia kreativu sira ka hanoin pozitivu no konstrutivu sira ne’ebé maka bele konklui atinjimentu susesu ba empreza ne’e rasik, wainhira iha inisiativa atu harii, hala’o, hamoris no haburas empreza ruma. Rekuru umanu ka servisu na’in sira konsidera hanesan fatór ba desizaun nomos vizionáriu estadista, atu propoin no deside integridade pesoál ida-idak nian, oin nusa atu kontribui hodi dezenvolve empreza ne’ebé nia rasik hakna’ar aan ba.
Atu sai empreza ne’ebé bele lori benefísiu ba ema barak nia nesesidade nomos bele iha biban, hodi bele fó moris di’ak ba nia-aan rasik no iha kbi’it no vontade atu kontinua fó nia-aan tomak, hodi hala’o servisu nafatin haboot empreza nia prevalese nomos lori konfiansa empreza ba ema hotu nia interese ho efetiva nomos efesiénsia. Rekursu umanu ba empreza hanesan rezultadu husi pensamentu inovativu nomos utilizasaun ba kbi’it husi nia emar ne’e dunik, hodi hala’o nia kna’ar ka servisu ne’ebé ita bele haree, sukat no sura husi dezempeñu no prestasaun sira, katak iha ka lae rezultadu di’ak no pozitivu ne’ebé fó vantanjen ne’ebé signifikante ba empreza.
Wanhira ita ko’alia kona-bá dezempeñu, maka servisu ne’ebé iha serteza katak, esforsu ne’ebé maka bele fó nia rezultadu ho kualidade nomos kuantidade ne’ebé maka rezulta rasik husi empreza nia servisu na’in sira, tuir kna’ar no responsabilidade ne’ebé maka haraik/fó ba nia rasik atu hala’o.
Atu rezulta dezempeñu ne’ebé ho kualidade aas maka ema ida-idak ne’ebé nudár servisu nain ba empreza persiza tebes iha ánimu vontade no responsabilidade ne’ebé boot. Dezempeñu servisu na’in ne’ebé di’ak, depende mos ba jestu husi jestór husi empreza ne’e rasik nomos atu buka hatene, identifika, análiza problema no preokupasaun sira husi servisu nain, fó solusaun ne’ebé justu no imparsialidade nomos tratamentu ba sira-nia direitu, hanesan wainhira sira hatuur ona sira-nia dever no reponsabildade ba empreza nia ezisténsia, atu nune’e ema hotu ne’ebé nudár servisu nain ba empreza ne’e, bele sente konfortavel nomos iha vontade atu serví no hadi’a sira-nia prestasaun di’ak liu tan iha futuru.
Obrigadu wa'in.
Ksolok tebes bele hasoru malu ho lee-na’in sira atraves website ofisiál BTL,E.P nian ida ne’e;
Website ida ne’e núdar meus komunikasaun ida ne’ebé maka sei transmite informasaun kona-ba atividade sira no mós relatoriu sira relasiona ho servisu BTL,E.P.
Aproveita oportunidade ida ne’e, hakarak hato’o mós hau nia parabens ba ekipa husi Media no mós IT nian ne’ebé maka ho rekursu tomak ne’ebé maka iha konsege hamosu kanál komunikasaun ida entre BTL,E.P ho Lé na’in sira atraves website ida ne’e.
Mai ita hamutuk kontinua fahe informasaun ba entidade sira hotu, ba maluk sira ne’ebé hala’o knar iha orgaun estadu nian, iha instituisaun governu ka NGO sira, nasionál ka internasionál, universitariu sira no parte hotu atu ita hamutuk liu husi kompremisu Governu nian atu bele liberta ita nia povu no nasaun husi kondisaun bee, saneamentu no ijiene nian, haktuir ba planu sira ne’ebé maka hatur ona iha biblia dezenvolvimentu nian maka hanaran PEDN.
Ikus liu, Fiar katak liu husi website ida ne’e lé na’in sira bele hetan informasaun sira kona-ba progresu tomak BTL,E.P nia.
Obrigadu barak.
