BTL,E.P

Ha’u iha onra hodi asume kna’ar nu’udar Prezidente Konsellu Administrasaun BTL, E.P no iha oportunidade hanesan, assume mós knar núdar Prezidente Komisaun Ezekutiva BTL, E.P nia, ho nune’e no liu husi meus komunikasaun ida ne’e hau hetan oportunidade atu fó lia menon kona-ba importánsia husi atividade Bee Timor-Leste, Empresa Pública (BTL, E.P), ne’ebé fó benefisiu ba povu tomak iha Timor laran tomak, iha área bee, saneamentu no Drainajén nian.

BTL, E.P nudár empreza estatál ne’ebé estabelese bazeia ba Dekretu Lei nú. 41/2020 loron 25 fulan Setembru ba kriasaun Empreza Públika Bee Timor-Leste (BTL, E.P) iha Governasaun Daualu nian.

Ezisténsia empreza estatál ne’e ho nia vizaun ida katak dezeja ou hakarak sai empreza públika bee no sanementu ida ne’ebé exelente.

Estabelesimentu Empreza Públika ne’e ho nia misaun hodi Aumenta asesu universál no ekitativa ba servisu bee moos no saneamentu ba populasaun hotu iha teritóriu nasionál, Mantein servisu regular, kontinua no efisiente ba abastesimentu bee no saneamentu, Promove servisu asesivu sira bee no saneamentu nian hodi bele kontribui ba dezenvolvimentu ekonómiku, sosiál, ambientál no teknolójiku, ikus nian mak Hodi hadi’a saúde públika no Promove dezenvolvimentu industrial, komersiál no peskiza.

Projetu Dekretu Lei ba estabelesimentu Empreza Públika Bee Timor-Leste no Respetivu Estatutu sira ne’e aprezenta husi Eis-Ministru Obras Públikas (MOP) Salvador Eugénio Pires aprova husi Konsellu Ministru iha Loron 01 fulan Abril tinan 2020 no Promulga husi Eis-Prezidente Repúblika Francisco Guterres Lu-Olo iha loron 20 fulan Jullu tinan 2020.

Liu husi website ofisiál BTL,E.P nian ida ne’e, maka sei trasmite informasaun sira hotu kona-ba atividade diaria husi nivel altu BTL,E.P nia to’o ba iha tékniku operadór sira nia iha terenu, ho objetivu ida maka atu promove transparansia ba públiku.

Alein ne’e, liu husi website ofisiál ida ne’e mak sei públika relatoriu sira hotu maka hanesan, relatoriu Trimestrál, Relatoriu Anuál, Relatoriu Semestrál inklui Relatoriu Audit.

Iha Website ne’e, BTL, E.P hakarak konsentra, fahe no promove lala’ok servisu BTL,E.P nian, atu ita hotu-hotu bele akompaña progresu pozitivu no dezafiu ba dezenvolvimentu programas ne’ebé BTL,E.P iha maka hanesan Bee moos, Saniamentu no Drainajén.

Espera katak ho Prezensa website ida ne’e bele responde ba públiku nia nesesidade atu asesu ba informasaun sira ne’ebé maka relevante ho servisu no atividade BTL,E.P nian.

Obrigadu barak.

Modalidade ne’ebé maka sai hanesan xavi no fatór importante no determinante, atu fó susesu ba servisu sira empreza nain maka fatór rekursu umanu. Basá iha arreadores jurídiku empreza, nia ema sira maka sei ko’alia, diskute, propoin no impoin, planu, ideia kreativu sira ka hanoin pozitivu no konstrutivu sira ne’ebé maka bele konklui atinjimentu susesu ba empreza ne’e rasik, wainhira iha inisiativa atu harii, hala’o, hamoris no haburas empreza ruma. Rekuru umanu ka servisu na’in sira konsidera hanesan fatór ba desizaun nomos vizionáriu estadista, atu propoin no deside integridade pesoál ida-idak nian, oin nusa atu kontribui hodi dezenvolve empreza ne’ebé nia rasik hakna’ar aan ba.

Atu sai empreza ne’ebé bele lori benefísiu ba ema barak nia nesesidade nomos bele iha biban, hodi bele fó moris di’ak ba nia-aan rasik no iha kbi’it no vontade atu kontinua fó nia-aan tomak, hodi hala’o servisu nafatin haboot empreza nia prevalese nomos lori konfiansa empreza ba ema hotu nia interese ho efetiva nomos efesiénsia. Rekursu umanu ba empreza hanesan rezultadu husi pensamentu inovativu nomos utilizasaun ba kbi’it husi nia emar ne’e dunik, hodi hala’o nia kna’ar ka servisu ne’ebé ita bele haree, sukat no sura husi dezempeñu no prestasaun sira, katak iha ka lae rezultadu di’ak no pozitivu ne’ebé fó vantanjen ne’ebé signifikante ba empreza.

Wanhira ita ko’alia kona-bá dezempeñu, maka servisu ne’ebé iha serteza katak, esforsu ne’ebé maka bele fó nia rezultadu ho kualidade nomos kuantidade ne’ebé maka rezulta rasik husi empreza nia servisu na’in sira, tuir kna’ar no responsabilidade ne’ebé maka haraik/fó ba nia rasik atu hala’o.

Atu rezulta dezempeñu ne’ebé ho kualidade aas maka ema ida-idak ne’ebé nudár servisu nain ba empreza persiza tebes iha ánimu vontade no responsabilidade ne’ebé boot. Dezempeñu servisu na’in ne’ebé di’ak, depende mos ba jestu husi jestór husi empreza ne’e rasik nomos atu buka hatene, identifika, análiza problema no preokupasaun sira husi servisu nain, fó solusaun ne’ebé justu no imparsialidade nomos tratamentu ba sira-nia direitu, hanesan wainhira sira hatuur ona sira-nia dever no reponsabildade ba empreza nia ezisténsia, atu nune’e ema hotu ne’ebé nudár servisu nain ba empreza ne’e, bele sente konfortavel nomos iha vontade atu serví no hadi’a sira-nia prestasaun di’ak liu tan iha futuru.

Obrigadu wa'in.

Ksolok tebes bele hasoru malu ho lee-na’in sira atraves website ofisiál BTL,E.P nian ida ne’e;

Website ida ne’e núdar meus komunikasaun ida ne’ebé maka sei transmite informasaun kona-ba atividade sira no mós relatoriu sira relasiona ho servisu BTL,E.P.

Aproveita oportunidade ida ne’e, hakarak hato’o mós hau nia parabens ba ekipa husi Media no mós IT nian ne’ebé maka ho rekursu tomak ne’ebé maka iha konsege hamosu kanál komunikasaun ida entre BTL,E.P ho Lé na’in sira atraves website ida ne’e.

Mai ita hamutuk kontinua fahe informasaun ba entidade sira hotu, ba maluk sira ne’ebé hala’o knar iha orgaun estadu nian, iha instituisaun governu ka NGO sira, nasionál ka internasionál, universitariu sira no parte hotu atu ita hamutuk liu husi kompremisu Governu nian atu bele liberta ita nia povu no nasaun husi kondisaun bee, saneamentu no ijiene nian, haktuir ba planu sira ne’ebé maka hatur ona iha biblia dezenvolvimentu nian maka hanaran PEDN.

Ikus liu, Fiar katak liu husi website ida ne’e lé na’in sira bele hetan informasaun sira kona-ba progresu tomak BTL,E.P nia.

Obrigadu barak.