Baucau, 20/03/2025,Vise-Prezidende Komisaun Ezekutiva, Bee Timor-Leste, Empreza Públika, ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva, Bee Timor-Leste, Empreza Públika, na Asuntu Korporativu, Sr. Manuel Tomás Amaral de Carvalho, akompana Jestór Infraestrutura BTL, E.P, Engineiru no Kordenadora BTL, E.P Munisípiu Baucau ho ekipa, sosializa informasaun kona-bá Projetu komstrusaun fornesimentu bee moos, iha Suku Bualale, Postu Administrativu Quelicai.
Iha intervensaun, Vise-Prezidente KE BTL, E.P, ba Asuntu Korporativu hatete, prejensa ne'e atu informa de'it ba komunidade sira katak, Projetu konstrusaun sistema fornesimentu bee moos ida ne'e, finaliza ona ka fizíku atinji 100%, tamba ne'e tau ba planu atu halo inaugurasaun ofisialmente entrega ba autoridade lokál no komunidade sira iha Suku Boalale atu halo jestaun ba bee refere.
"Hanesan ita hotu hatene, Komandante Daitula hanesan Quelicai oan, nia kontribuisaun ba rai ida ne'e, hakarak rai ne'e atu hetan ukun an, ho luta nain sira nian ne'e konsege hetan liberdade, tamba ne'e nu'udar servidór estadu no ba povu ida ne'e ami valoriza nafatin ispritu ida ne'e, hodi kontinua lori dezenvolvimentu liu-liu liga ba bee moos ba populasaun sira".
Vise-Prezidente Komisaun Ezekutiva BTL, E.P, ba Asuntu Tékniku informa, kontinua fo onra ba luta nain sira nia sakrifisiu tomak, ne'ebé sira halo ba rai ida ne'e, ohin loron sai nasaun independente, tan ne'e kuidadu sistema bee moos, ne'ebé governu liu hosi BTL, E.P kanaliza ona mai iha Suku Boalale.
"Husu populasaun sira ho konsiensia tomak, labele sobu taka bee ba malu, sobu sistema tun sae, maibé kuidadu sistema ne'e, tamba torneira públika besik ona uma, hodi utiliza bee ba nesesidade uma laran, nune'e mos oan sira dader no meudia uza ba haris, kose nehan ba eskola".
Projetu Konstrusaun Sistema Fornesimentu ne'e fizíku atinji ona 100%, maibé dala ruma komunidade individu balun malu maka laiha konsiensia hodi taka bee, iha tanke rezervatóriu, nune'e prejudika labele fornese bee ba abitante sira, maibé ho prejensa BTL, E.P konsege observa sistema sira, hodi normaliza ona.
Sistema bee rural ida ne'e, dadaun tama ona ba faze manutensaun ka retensaun ba projetu ne'e, wainhira finaliza ida ne'e, sei inaugura hodi entrega ona ba autoridade lokál no komunidade sira, atu bele halo jestaun ba sistema refere.
Fahe ba Sosial Media:
