Baucau,25 Jullu 2026 - Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, Vise-Prezidente KE BTL, E.P ba Asuntu Tékniku, José Filipe Ximenes Smith, Vise-Prezidente KE BTL, E.P ba Asuntu Korporativu, Manuel Tomas Amaral de Carvalho, hamutuk ho Diretór DEI, João da Cruz Cardoso, Diretór DAF Sidónio Freitas Diretór DOM Aleixo Dos Santos,Jestór Insfreastrutura Koordenadóra BTL, E.P Munisípiu Baucau ho ekipa tekniku sira akompaña S.E Ministru Obras Públikas (MOP), Samuel Marçal no S.E Primeiru-Ministru (PM), Kay Rala Xanana Gusmão halo lansamentu ba Projetu sistema beemos no kontinua asina kontratu ho kompañia ne'ebe kaer obra iha Postu Administrativu Venilale Vila,Mnisípiu Baucau sabadu semana ne’e.
Projetu Melloramentu fornesimentu sistema bee moos iha postu administrativu Venilale ne’e implementa hosi kompañia NJZP 18 Unipe L.da JV PT. Dimas Kurnia Jaya ho durasaun tempu fulan 8 no orsamentu ba projetu ne’e hamutuk U$ 1,381, 495,71.
Depois de halo lansamentu Projetu sistema beemos iha postu referida,Primeiru-Ministru, Kay Rala Xanana Gusmão, hateten atividade ohin loron atu kumpri de’it ezizénsia ne’ebé ferik katuas sira hakarak tamba husi sira-nia terus mak ohin loron ita hetan ukun-an.
"Tamba ne’e maka iha ukun-an nia laran joven sira tenke hanoin uluk sira terus mak ita hetan ukun-an durante tinan 24 nia laran", PM Xanana ko'alia iha diskurau atividade lansamentu iha Venilale, ohin.
Xefe Governu dehan ohin ita ne’ebé sei moris tenke kontinua ezerse ita-nia servisu no responsabilidade hodi rai no povu ida-ne’e.
"Tinan 24 ona ita ukun-an ita haree ba povu ne’ebé terus ten tebes, moris at hela moris laiha kondisaun tamba ne’e maka hotu-hotu ne’ebé ohin loron servisu la’ós atu manan osan maibe atu serví ba rai ida-ne’e ho diak", nia apela.
Ministru Obra Públika, Samuel Marçal, ida-ne’e marka pasu importante ida ba dezenvolvimentu iha Munisípiu Baukau, liuliu iha Postu Administrativu Venilale. Hanesan ita hatene, estrada, bee moos no estrada mak infraestrutura bázika ida-ne’ebé importante tebes no fundamentál atu aselera dezenvolvimentu iha setór hotu-hotu.
"Ita bele ko’alia kona-ba turizmu, edukasaun, saúde no setór seluk tan, maibé programa hotu-hotu sei la lao di’ak se laiha eletrisidade. Tanba ne’e, hau hakarak fó parabéns ba komunidade tomak iha Venilale", Ministru deklara.
Governante ne'e dehan ohin, komunidade hamutuk iha ne'e sente kontente no orgullu tanba finalmente bee moos no estrada to’o ona ba sira-nia área. Ne’e hatudu katak Governu, liuhusi orientasaun ne'ebé Primeiru-Ministru, fó prioridade boot ba infraestrutura bázika tolu, hanesan bee moos, eletrisidade no estrada. Setor tolu ne’e mak sai baze ba dezenvolvimentu nasionál.
"Ha'u husu ba komunidade hotu, liuliu família sira ne’ebé hela besik área servisu, atu koopera ho empreza sira atu bele remata obra tuir tempu no tuir kontratu, tamba sei fó benefísiu ba komunidade sira, ba autoridade lokál sira tenke tau matan halo kontrolasaun", nia solisita.Tanba ne’e nia dehan responsabilidade ne'e la’ós de’it Governu nian, maibé komunidade mós tenke kontribui tau matan no kuidadu ba patrimóniu públiku.
"Hafoin ohin ita halo lansamentu, semana tuir kompañia kontinua implementa ona tamba la liuhusi vistu tribunál", nia esplika.
Preszidente Autoridade Munisípiu Baukau, Veneranda Eurico Lemos Martins, reprezenta komunidade sira iha postu Venilale, hato'o beinvindu ba Governu Sentrál, ne'ebé nafatin kria dezenvolvimentu ba teritóriu Timor-Leste Tomak, inklui ida maka munisípiu Baukau
Nune'e autoridade lokál solisita ba setór privadu sira atu labele hadau malu ba projetu, maibé ita tenke hamutuk no apoia malu atu garante nafatin dezenvolvimentu ida-ne'ebé mak estabilidade tamba ita pakote ida de'it (família).
Partisipa iha lansamentu ne’e membru Governu balun ho membru parlamentu no autoridade lokal ho komunitaria sira iha postu referida.
Fahe ba Sosial Media:
