Baucau, 13/03/2023, Koordenadora Bee Timor-Leste, Empreza Públika (BTL, E.P) munisípiu Baucau ho ekipa halo enkontru koordenasaun ho lideransa komunitáriu suku no aldeia Caibada Uaimua, Postu-administrativu Baucau Villa, munisípiu Baucau.
Enkontru koordenasaun ne’e, hodi halo melloramentu ba sistema bee moos iha suku Caibada Uaimua, ne’ebé durante tinan barak (tinan hitu) ona la asesu bee, tanba sistema ezistente avaria, hodi prejudika distribuisaun bee ba konsumidór sira, tanba ne’e liuhosi koordenasaun ne’e, atu hadi’a fila-fali sistema refere, nune’e sistema ne’e bele funsiona, hodi fornese hikas bee ba komunidade sira, iha suku Caibada Uaimua, liuhosi kontribuisaun balun hosi komunidade sira.
Durante iha enkontru ne’e, autoridade lokál sira relata mos kontribuisaun balun hosi komunidade sira, hanesan kanu ho medida 3" hamutuk lolon 30 kompleta ho nia kadeli 30, maibé sei falta asesoris balun, tanba ne’e BTL, E.P sei apoia asesoris/materiál hirak ne’e, hodi kompleta ba preparasaun iha atividade melloramentu ba sistema bee iha suku Caibada Uaimua.
Iha biban ne’e, Xefe suku Caibada promete, nia rasik sei hamutuk ho komunidade sira iha ne’e, sei servisu hamutuk ho BTL, E.P, hodi halo servisu melloramentu ba sistema bee iha sira nia suku no sei kumpri regras sira ne’ebé BTL, E.P estabelese ona.
Enkuantu servisu melloramentu ne’e, sei hahú hosi área entre sede suku Bahu ho sede suku Caibada nian, ho distánsia metru 2100 (2100m). No iha akordu entre suku Bahu no Caibada hodi servisu hamutuk iha melloramentu sistema bee moos ne’e.
Fahe ba Sosial Media:
