Dili, 31 Agostu 2026 – Bee Timor-Leste, E.P. (BTL, E.P.), liuhosi Departamentu Kontrolu Qualidade no Ambientál (DCQA),halo apresentasaun kona-ba Manuál Kualidade Laboratóriu Kualidade Bee no Preparasaun ba Akreditasaun ISO/IEC 17025:2017 ba Komisaun Ezekutivu BTL, E.P.
Iha aprezentasaun Manual kualidade ne’e akompaña hosi Prezidente Komisaun Ezekutiva (KE) BTL, E.P, Gustavo da Cruz,Vise-Prezidente Konsellu Ezekutivu (KE) ba Asuntu tekniku José Filipe Ximenes Smith no Vise Prezidente Konsellu Ezekutivu ba Asuntu Korporativu Manuel Tomás Amaral de Carvalho no Diretór Administrasaun no Finansas (DAF) Sidonio Freitas , Diretór Enjeñeiru no Infraestrutura (DEI ), João da Cruz Cardoso no Diretór Operasaun no Manutensaun Aleixo dos Santos (DOM) no involve mós Jestóra Administrasaun Finansas (JAF), Jestóra Rekursu Humanu (JRHJ )Jestór RP & GIS Unit,Jestór IT ho Kordenadór Juridiku,iha Salaun enkontru Edifisiu BTL,EP Kaikoli Dili Segunda semana ne’e.
Objetivu prinsipal mak atu hametin komprensaun komún kona-ba sistema jestaun kualidade laboratóriu no preparasaun BTL,E.P nian ba prosesu akreditasaun tuir padraun internasionál ISO/IEC 17025:2017.
Manuál Kualidade ne’e sai nu’udar matadalan prinsipal atu orienta oinsá Laboratóriu BTL,EP jere sistema kualidade,kompeténsia téknika, responsabilidade, rekursu, prosesu teste, rejistu no prosesu hadia kontinuamente.
Durante diskusaun ne’e Komisaun Ezekutivu no Departamentu Unidade relevante sira fó mós, sujestaun no kontribuisaun importante balun atu kontinua haforsa Manuál Kualidade ne’e hodi asegura nune sistema ne’e bele implementa ho efetivu iha operasaun laboratóriu loro-loron.
No pasu tuir mai, BTL,E.P sei prepara Roadmap klaru ba implementasaun Manuál Kualidade ne’e hodi halo preparasaun ba akreditasaun ISO/IEC 17025:2017. Roadmap ne’e sei orienta asaun prioridade sira, inklui definisaun ámbitu akreditasaun, avaliasaun ba lakuna sira, implementasaun sistema jestaun, preparasaun evidénsia no rejistu tékniku, haforsa kompeténsia pesoál no rekursu laboratóriu, hala’o auditoria interna no revizaun jestaun, no preparasaun ba avaliasaun esterna.
Inisiativa ida-ne’e reflete kompromisu BTL, E.P. atu kontinua haforsa kompeténsia laboratóriu, aumenta konfiansa ba rezultadu teste kualidade bee, no hadi’a kualidade, konfiabilidade no transparénsia servisu laboratóriu, tuir padraun internasionál ne’ebé rekoñesidu.
Fahe ba Sosial Media:
