Díli, 27/03/2023, Diretór hosi Diresaun Operasionál no Manutensaun (DOM) BTL, E.P, Sr. Aleixo dos Santos partisipa iha atividade (Traning of Trainer-ToT) ou treinamentu ba Diretór SMASA sira hosi munisípiu 13, tuir Planu Asaun Komunidade (PAK). Atividade refere realiza iha salaun João Paulo II, Comoro, Díli.
Atividade treinamentu ne'e organiza hosi ANAS, I.P durante loron lima ho objetivu hodi prepara pesoál sira ne'e, atu sira prontu no bem preparadu hodi halo operasaun no manutensaun ba sistema bee rurál sira iha territóriu nasionál.
Iha biban ne'e, Diretór DOM BTL, E.P mos ko'alia kona-bá Papel BTL, E.P nian, iha faze dahuluk mak mellora sistema bee iha kapitál urbanu no postu-administrativu sira iha territóriu nasionál. Alende ne'e, iha tinan rua ne'e, BTL, E.P foin tama iha suku lima, tanba ne'e, presiza servisu hamutuk ho SMASA, NGO lokál no internasionál sira, atu bele halo operasaun no manutensaun iha área rurál sira. Tanba ne’e, atu atinji metas tuir planu PEDN tinan 2011-2030 ne’e, presiza kontribuisaun ou servisu hamutuk entre parte hotu.
Diretór DOM hatete hein katak liuhosi treinamentu ba kapasitasaun ba pesoál SMASA sira ne’e, sir abele aplika fila-fali iha terrenu, nune’e bele lori bee hakbesik ba populasaun sira iha área rurál.
Durante iha atividade treinamentu ne'e, Diretór Jerál Desentralizasaun Administrativa hosi Ministériu Administrasaun Estatál (MAE) husu ba Diretór SMASA sira atu labele hamosu tan dezentendimentu ho funsionáriu BTL, E.P nian, hanesan antes ne'e, tanba ezisténsia BTL hanesan Empreza Públika (BTL, E.P) ho nia estatutu ne'ebé klaru katak hodi rekolla reseitas, atu kontribui ba dezenvolvimentu nasaun nian. Tanba ne'e, parte SMASA atu labele entende sala katak, ezisténsia BTL, E.P ne’e hodi hadau knaar SMASA nian.
Diretór Jerál ne'e mos solisita, wainhira BTL, E.P hala'o atividade sosializasaun ou enkontru ruma, presiza konvida mos Diretór Jerál MAE nian, hodi bele esplika detalla kona-bá servisu BTL, E.P no SMASA nian.
Fahe ba Sosial Media:
