Díli, 25/10/2023. Vise-Prezidente Komisaun Ezekutiva (KE) Bee Timor-Leste Empreza Públika (BTL, EP) ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Project Management Unit-PMU BTL, E.P hamutuk ho Xefe Gabinete Ministru Obras Públikas (MOP) hala’o enkontru ho Xefe Departamentu Pesoál Polísia Nasionál Timor-Leste (PNTL), Superintendente Asistente Polísia, Graciano Moniz Amaral, ho Especialista do Serviço de Proteção da Natureza e do Ambiente (SEPNA) da Guarda Nacional Republicana (GNR) de Portugal, Majór Ricardo Samouqueiro no Sarjentu-Xefe Bruno Brandão, iha salaun enkontru Ministériu Obras Públikas (MOP), Caicoli, Díli.
Reuniaun ne’e, lidera hosi Xefe Gabinete MOP ho objetivu, hodi halo koordenasaun ou konsultasaun, atu hetan informasaun sira, liu-liu regulamentu no baze legál sira iha setór bee, saneamentu no drenajen nian. Nomos hosi parte PNTL nian partilla mos informasaun ligadu ho planu ba instalasaun Departamentu foun ida, iha Komandu Jerál PNTL nian, ho naran Departamentu Protesaun Natureza no Ambiente (DPNA). Tanba ne’e, ohin parte rua partilla informasaun hirak ne’e, nune’e iha futuru ho estabelesimentu Departamentu foun ne’e, bele estabelese mos protoku ou kooperasaun ida, atu PNTL bele apoia hodi haree ba natureza, ambiente no rekursu bee inklui bele asegura infraestrutura sira.
Enkuantu estabelesimentu Departamentu foun ne’e ho nia finalidade mak atu servisu hamutuk ho liña ministeriál sira ne’ebé ligadu ho meiu ambiente iha Timor-Leste (TL) inklui MOP-BTL, E.P ne’ebé responsabiliza ba iha setór bee nian.
Iha biban ne’e, MOP liuhosi BTL, E.P apresia tebes ho planu refere, nune’e wainhira iha futuru estabelese duni Departamentu foun ne’e, MOP-BTL, E.P prontu servisu hamutuk ho PNTL hodi proteje natureza no asegura rekursu bee sira iha TL.
Fahe ba Sosial Media:
