Lautém, 08/11/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Lautém hamutuk ho traballadór Mão de Obra (MdO), halo reparasaun ba kanu distribuisaun bee PVC DN 100mm ne’ebé ku’ak, iha munisípiu Lautém.
Tuir informasaun hosi terrenu katak, tékniku sira identifika kanu distribuisaun bee ne’e ku’ak ou estragus iha fatin rua, hanesan iha Bairu Puihoro no 30 de Agosto, kauza ai abut nomos movimentasaun veikulu boot ne'ebe sama direta ba kanu, nune'e rezultadu kanu nakfera, maibé hafoin identifikasaun tékniku sira mobiliza materiál hodi hadi’a estragus refere, hodi garante distribuisaun bee ba komunidade sira iha fatin rua ne’e.
Alende ne’e, hafoin atividade reparasaun, tékniku sira kontinua instala metru kontadór unidade ida ba abitante uma kain ida, iha bairu Kaito, suku Fuiloro, postu-administrativu Lospalos, ne’ebé antes ne’e, konsumidór refere rejista no halo pagamentu, hodi sai kliente no bele asesu bee ne’ebé kanaliza hosi BTL, E.P.
Iha biban ne’e tékniku operadór sira mos dezliga koneksaun sistema bee ba uma ne’ebé abandonadu, iha bairo Kaito suku Fuiloro, atu nune’e bele utiliza hodi liga fali ba komunidade sira seluk.
Fahe ba Sosial Media:
