.JPG)
Iha loron sanulu, fulan outobru, tinan rihun rua rua nulu resin tolu, Vise-Prezidente Komisaun Ezekutiva BTL, E.P ba Asuntu Sistema Bee, Saneamentu no Drenagen, Gustavo da Cruz, akompaña Diretór Operasaun no Manutensau, Aleixo dos Santos no Kordenadór BTL, E.P Ermera ho ekipa inaugurasaun sistema bee moos, ne’ebé lokaliza iha Aldeia Tedibesi, Suku Lisabat, Postu Administrativu Hatolia B.
Projetu melloramentu ba sistema bee moos ida ne’e, hetan apoia finanseiru, husi parseiru UNICEF iha Timor-Leste, hodi bele halo reabilitasaun ba bee moos refere.
Iha serimónia ne’e, Vise-Prezidente KE BTL, E.P, ba Asuntu Sistema Bee, Saneamentu no Drenagen hato’o agredesimentu ba parseiru UNICEF, ne’eb’e apoia ona fundu, liu husi BTL, E.P, bele halo kanalizasaun bee moos ba komunidade sira.
Iha okaziaun ne’e, Ezekutivu husu ba Autoridade lokál no komunidade sira katak, persija tau matan didi’ak no kuidadu fasilidade sira, hodi bele dura ba tempu naruk.
“ha’u agredese bai ta boot sira, tamba imi bele asesu ona bee moos, maibe iha Aldeia no Suku seluk iha territóriu nasionál seidauk asesu bee hanesan imi, tamba ne’e tenki kontrola ho di’ak, hodi bele fo oportunidade ba BTL, E.P, bele konsentra fila fali ba komunidade sira seluk”.
Ezekutivu ne’e, afirma, ho mudansa klimatika ne’ebé akontese iha mundu inklui Timor-Leste, ne’eb’e fo impaktu makaas ba iha rekursu bee, ho nune’e ba komunidae sira nia kontribuisaun ho konsiensia rasik, bele konserva bee matan, liu husi kuda ai-oan sira, ne’ebé bele produz bee, hodi bele garante rekursu bee ba jerasaun sira tuir mai.
Iha fatin hanesan, Diretór O&M hatete, ho kontribuisaun komunidade sira nian, durante prosesu konstrusaun ne’e la’o to’o finaliza projetu ne’e, nune’e maka ba oin bele kolabora no servisu hamutuk nafatin, hodi bele asegura fasilidade importante sira ne’e.
Biban ne’e mos, Xefe Aldeia Tedibesi, lori povu nia naran agredese ba BTL, E.P, ne’ebé servisu hamutuk ona ho parseiru UNICEF, hodi bele hadi’a sistema bee moos ida ne’e.
Autoridade lokál ne’e reafirma katak, nu’udar liderasan komunitáriu sei tau matan no kontrola fasilidade sira ne’e ba tempu naruk.
Durante konstrusaun ne’e la’o hetan apoia tékniku husi BTL, E.P rasik servisu hamutuk ho Autoridade lokál no komunidade sira, hodi halo kanalizasaun, konstrui Tanke Rezervatóriu rua, ho Torneira Públiku 18.
Obra ne’e, hetan fundu husi parseiru UNICEF, liu husi BTL, E.P hodi implementa projetu reabilitasaun ida ne’e, ho montante dollar amerikanu rihun sia, atus tolu tolu nulu resin hitu ho sentavus haat nulu resin lima ( $ 9.337,45).
Projetu sistema bee moos ida ne’e, sei benefisia ba uma kain atus ida resin, ho nia populasaun atus hitu resin, inklui fasilidade públiku sira, ne’ebé sei konsumu bee moos ida ne’e.
Partisipai ha serimónia inaugurasaun sistema bee moos ida ne’e maka hanesan, Diretór SMASA Munisípiu Ermera, Diretór Saúde Munisípiu Ermera, Xefe Gabinete Prezidente Autoridade Munisípiu Ermera, autoridade lokál, komunidade sira.
Fahe ba Sosial Media:
