Baucau, 19/04/2023, Prezidente Komisaun Ezekutiva BTL, E.P, Eng. Carlos Peloi dos Reis, akompaña husi Diretór Operasaun no Manutensaun, Aleixo dos Santos, Jestór Infraestrutura BTL, E.P, Estelio dos Santos ho ekipa hamutuk intidade relevante sira no autoridade postu, autoridade lokál sira lansa projetu sistema fornesimentu bee moos iha Suku Defavasi, Postu Administrativu Baguia.
Iha serimónia Lansamentu ne’e, Prezidente Komisaun Ezekutiva, E.P, BTL, E.P husu ba autoridade lokál sira, atu kontribui hodi bele implementa projetu ida ne’e, labele iha impedimentu ruma husi komunidade balun.
Líder maxímu BTL, E.P ne’e afirma, kona-bá problema sosiál ne’e, autoridade lokál nia servisu oinsa bele rezolve kestaun ida ne’e, problema tékniku nian maka BTL, E.P responavél ba ida ne’e.
Ezekutivu ne’e akresenta, wainhira obra ne’e finaliza ona, autordade lokál no komunidade sira, utiliza ho kuidade, nune’e bele uza bee ne’e ba tempu naruk.
Iha fatin hanesan, Administradór Postu Administrativu Baguia, António dos Ramos, lori povu Baguia nia naran hato’o agradesimentu ba oitavu governu konstitusionál, liu husi Bee Timor-Leste Empreza Públika, ne’ebé bele kanaliza bee ba populasaun sira, tamba tinan barak abitante sira ne’e difísil asesu bee moos.
Ho projetu konstrusaun sistema bee moos ida ne’e, wainhira remata sei fasilita populasaun sira iha postu refere, la ba distánsia dook ona, maibé bee kanlizasaun bee moos ida ne’e, sei halo ligasaun direita ba kada uma, hodi utiliza bee ne’e ba nesesidade uma laran.
Iha sorin seluk, Adjunto Komandante Esquadra Baguia,Belarmino Gusmão hatete, husi parte Polisia Nasionál Timor-Leste, hanesan autoridade seguransa prontu kolabora , nune’e projetu ida ne’e bele la’o ho susesu.
Belarmino Gusmão haktuir, wainhira iha problema ruma akontese iha iha terrenu, PNTL iha disponibilidade hodi bele ajuda rezolve problema ruma hanesan iha impedimentu ba projetu, maibé bee nu’udar nesesidae bazíku ka nesesidade primaria, tamba ne’e persiza ema hotu kontribui, atu bele garante projetu ne’e, finaliza tuir termu kontratu ne’ebé iha ona.
Projetu Konstrusaun Sistema Bee Moos iha Postu Administrativu Baguia ne’e, sei implementa hosi kompañia Hezeldan Unipessoal Lda joint venture ho Milcha Unipessoal Lda. Orsamentu ba projetu refere ho montante $ 844,640.87 ho durasaun tempu fulan neen.
Projetu sistema bee moos iha Baguia ne’e, sei kobre ba suku tolu, hanesan suku Alawa Leten, Alawa Kraik no Haekoni, postu-administrativu Baguia Villa, ne’ebé h onia populasaun hamutuk 2.950. Nune’e mos sei fornese bee ba instituisaun públika sira hanesan, postu saúde, eskola no igreja.
Partisipa iha serimónia lansamentu ba projetu sistema bee moos ida ne’e, BTL, E.P, Prezidente ANAS, I.P, Prezidente Konsellu Fiskál ho Membru Konsellu Fiskál, Reprezentante Administradór Munisípiu Baucau, Administradór Postu Administrativu Baguia, Xefe Suku, Xefe Aldeia no komunidade sira.
Fahe ba Sosial Media:
