Díli, 13/09/2022, Prezidente Komisaun Ezekutiva BTL, E.P, Eng. Carlos Peloi dos Reis, partisipa iha programa Talk Show, ho tópiku dezenvolvimentu iha setór bee ba tinan 2011-2030. Programa ne’e organiza hosi Bee Saneamentu no Ijiene-BESI, ne’ebé realiza iha studio RTTL, E.P.
Bee Timor-Leste Empreza Públika konsiente katak, sei dezenvolve iha setór bee, nune’e komunidade sira bele asesu bee moos.
Prezidente K.E BTL, E.P hatete, esforsu hirak ne’e la’o hela, tamba ne’e persiza pasiensia, tamba sei la halo buat hotu dala ida, maibé sei dezenvolve neneik, atu bele lori bee moos ba populasaun iha territóriu nasionál.
Prezidente K.E BTL, E.P ne’e hatutan, esforsu ida la’o dadaun ne’e mak halo melloramentu ba sistema ezistente sira ne'ebe tuan/antigu ona, tamba ne’e mak ekipa tékniku sira, kontinua mellora sistema iha Kapitál Díli, no mos iha munisípiu sira seluk.
Alende ne’e, governu mos tau preoridade ba setór bee moos, tamba ne’e mak hahu iha 2018 to’o iha 2022, konsege promove projetu melloramentu no projetu konstrusaun sistema bee moos iha teritóriu laran tomak, hamutuk atus ida sia nulu.
Governu Timor-Leste estabele ona akordu ho parseiru dezenvolvimentu Banku Mundiál, hodi mellora sistema bee moos iha parte Díli Leste, no iha parte Oeste sei iha faze prosesu negosiasaun entre governu ho ADB.
Fahe ba Sosial Media:
