Manatuto, 23/04/2024, Prezidente Komisaun Ezekutiva BTL, E.P, Eng. Carlos Peloi dos Reis, Vise-Prezidente KE BTL, E.P, ba Asuntu Sistema Bee Saneamentu no Drenajen, Gustavo da Cruz, Vise-Prezidente KE BTL, E.P, ba Asuntu Boa Governasaun no Fortalesimentu Institusional, Elizabeth Amaral, Diretór DEI BTL, E.P, Jestór Infraestrutura BTL, E.P, Kordenadór BTL, E.P Munisípiu Manatuto ho ekipa akompaña S.E Ministru Obras Públikas, Sr. Samuel Marçal, Inaugura Projetu Melloramentu Sistema Bee Moos iha Suku Cribas, Postu Administrativu Manatuto.
Iha serimónia Inaugurasaun bee ne’e, Prezidente KE BTL, E.P hatoo agradesimentu ba Populasaun, Autoridade Lokál, Administradór Postu Administrativu Manatuto, Kompañia Implementadór, ne’ebé kontribui no kolabora hamutuk, bele finaliza projetu ida ne’e. Ezekutivu mos agradese ba rain nain, ne’ebé oferese fatin ho voluntariu, hodi harii Tanke Rezervatóriu bee ba interese públiku nian.
Iha oportunu ne’e, Superior BTL, E.P agradese ba ekipa IPG, halo estudu no fura bee moos iha Suku Cribas, ne’ebé maka BTL, E.P halo melloramentu no kanaliza bee too ona komunidade sira nia rezidensia ida-idak.
“Ha’u fo mensagen ba partisipante sira, atu kuidadu nafatin sistema ne’ebé iha ona, hodi fo biban ba governu liu husi BTL, E.P atu bele lori bee ba fali komunidade hirak, ne’ebé sei halerik iha área seluk. Husu mos ba abitante sira atu labele tesi ai, sunu rai, hodi nune’e rekursu bee labele menus no lakon, maibé husu komunidade sira nia kontribuisaun maka kuda ai-oan, hodi bele rekopera natureza ne’e, produz nafatin rekursu bee ho di’ak ba jerasaun tuir mai”.
Administradór Postu Administrativu Manatuto, José Pedro da Cunha, lori povu manatuto, liu-liu Suku Cribas, parabeniza ba Ministériu Obras Públikas, liu husi BTL, E.P, ne’ebé bele halo ona melloramentu ba sistema bee moos, hodi minimiza ona povu nia sofrementu durante ne’e. Autoridade ne’e mos husu ba benefisiariu sira asesu bee, maibé persija asegura fasilidade sira ne’e ho responsabilidade.
S.E Ministru Obras Públikas, Sr. Samuel Marçal hatete, governu tau preoridade liu ba bee, saneamentu, eletrisidade no estrada, tamba ne’e sistema bee moos, ne’ebé iha ona, utuliza didi’ak.
“Ha’u lembra wainhira ami prepara planu, no orsamentu, halo diskusaun ho diresaun sira hotu, liu-liu programa sira, ne’ebé relasaun ho komunidadeno povu kiik sira nia moris loron-loron, ha’u sempre fo preoridade tebes-tebes, hodi defende nafatin para tau osan para program sira ne’e, bele la’o nafatin, hodi labele para”.
Obra ne’e, finansia ho orsamentu hamutuk dollar amerikanu rihun atus haat rua nulu resin sira, atus sia haat ho sentavus ualu nulu resin sia, benefisiariu husi sistema bee moos ida ne’e, uma kain 454 ho nia populasaun rihun tolu, atus neen ualu nulu resin tolu (3.683).
Serminónia inaugurasaun sistema bee moos ida ne’e, S.E Ministru Obras Públikas, Samuel Marçal, Komisaun Ezekutiva BTL, E.P, Membru Konsellu Fiskal BTL, E.P, Reprezentante husi SEEAS, Komandante PNTL Munisípiu Manatuto, Administradór Postu Administrativu Manatuto, Diretór IPG, Autoridade Lokál, Veteranu, komunidade no partisipante sira seluk.
Fahe ba Sosial Media:
