Liquiça, 05/09/2024, Prezidente Komisaun Ezekutiva BTL, E,P, Eng. Carlos Peloi dos Reis, Vise-Prezidente Komisaun Ezekutiva BTL, E.P, ba asuntu Sistema Bee Saneamentu no Drenagen, Gustavo da Cruz, Vise-Prezidente Komisaun Ezekutiva BTL, E.P, ba Asuntu Boa Governasaun no Fortalesimentu Institusional, Elizabeth Amaral, Vogál BTL, E.P Francisco da Silva, Konsellu Fiskál, Jestór Infraestrutura BTL, E.P, Engeñeiru, Kordenadór BTL, E.P no ekipa, akompaña S.E Ministru Obras Públikas, Samuel Marçal, Reprezentante SEEAS, Reprezentante Prezidente Autoridade Munisípiu Liquiça, Administradór Postu Administrativu Maubara, Autoridade Lokál no Komunidade sira, inaugural ofisialmente projetu konstrusaun sistema fornesimentu bee moos, ne’ebé lokaliza iha postu Adminitrativu Maubara.
Iha intervensaun, Prezidente KE BTL, E.P hatete, uluk iha postu administrativu hamutuk 48, ne’ebé laos hola parte hosi Munisípiu, maibé agora aumenta tan rua, hanesan iha Liquiça no mos iha Lore. Postu Administrativu sira ne’e, BTL, E.P nia prezensa iha ona 23 inklui iha Maubara, nune’e mos seluk finaliza hotu dezeñu detalladu no BoQ.
Iha nivél kapitál munisípiu lima, konsege dezeñu detalladu hanesan Díli, Baucau, Viqueque, Lautém no Manufahi no Munisípiu 6 seluk, finaliza ona master plan. Além de ne’e, BTL, E.P mos promove projetu ba suku balun no spois msterial deit ba pedidu sira hosi autoridade no komunidade sira kanaliza bee, nune’e mos aproxima parseiru internasionál no lokal sira hodi apoia govenu liu-liu BTL, E.P, hodi lori bee ba komunidade sira nia leten iha área rurais.
“Ha’u agredese ba autoridade lokál no komunidade sira, tamba bele apoia BTL, E.P hosi inisiu too mai iha momentu ida ne’e, hodi inaugural projetu konstrusaun fornesimentu bee moos. Agradese mos mos ba kompañua implementadór, ne’ebé iha responsabilidade hodi finaliza projetu ida ne’e, maske durante iha prosesu implementasaun hasoru dezafiu barak, maibé kompañia kontinua servisu, ho remata servisu ne’e ho di’ak”.
Iha biban ne’e mos Ezekutiva husu ba komunidade no autoridade lokál, atu kuidadu sistema ne’ebé iha ona, nune’e fo biban ba govenu liu hosi BTL, E.P atu lori fali bee ka projetu ba fatin seluk, ne’ebé komunidade balun sei halerik hela ba bee moos. Husu mos ba populasaun sira nia kontribuisaun maka labele sunu rai, tesi ai, hodi nune’e labele fo impaktu ba rekursu bee iha rai okos, tamba wainhira foho mamuk, maka bee iha rai okos sei kontinua maran ba bebeik, tamba ne’e husu ba apoia atu kontribui labele tesi no sunu rai, atu bele asegura sistema ida ne’e ba tempu naruk.
Administradór Postu Administrativu Maubara, agradese ba governu no BTL, E.P, tamba bele rezolve ona komunidade sira nia preokupasaun, relasiona ho bee moos, durante ne’e abitante susar asesu bee, maibé ho sistema ne’e, bele ajuda, hodi kuru bee iha uma de’it.
S.E Ministru Obras Públikas, Samuel Marçal hatete, povu nia nesesidade bazíku maka hanesan bee, eletrisidade, Estrada no seluk tan, tamba ne’e governu kontinua halo esforsu, hodi liberta povu ida ne’e hosi sofrementu, maske barak prosesu lao neneik, maibé sei lao bebeik.
S.E Ministru Obras Públikas mos agradese ba Komisaun Ezekutiva BTL, E.P, ho ekipa tomak, halo esforsu durante ne’e, hodi promove projetu bee iha postu administrativu sira, ne’ebé maka fo benefisiu ba populasaun sira, bele asesu ona bee moos. Tamba ne’e governu iha komitmentu kontinua aloka osan bai ha setór bee, nune’e dezenvolve di’ak liu ba futuru.
Projetu ida ne’e, finansia hamutuk dollar amerikanu $ 543,634.66, hodi installa Liner Tank Unidade 4 no halo instalasaun ba sistema kanalizasaun.
Benefisiariu ba bee moos ida ne’e, komunidade uma kain atus rua ualu nulu (280 uk) h onia populasaun hamutuk rihun rua, atus rua, tolu nulu resin rua (2.232).
Fahe ba Sosial Media:
