Aileu, 07/10/2023. Bee Timor-Leste, Empreza Públika (BTL, E.P) preokupa ho komunidade balun kontinua haris iha intake Tohumeta ne'ebé lokaliza iha aldeia 02 Berliumet, suku Tohumeta, postu-administrativu Laulara, munisípiu Aileu
Maske kompañia implementadór Thobishima ne'ebé halo hela servisu reabilitasaun ba intake Tohumeta, dada ona liña polísia no tau ona avizu proibisaun iha fatin refere, maibé populasaun balun laiha konsiénsia no sira nafatin kontra regras hodi kontinua asesu ou haris, iha intake refere.
Tanba ne'e, ohin parte BTL, E.P liuhosi Diresaun O&M nian, kontaktu ona ba xefe suku Tohumeta, hodi hato'o asuntu refere no xefe suku rasik husu ba BTL, E.P atu halo intervensaun, hodi evita ema labele asesu ba fatin ne'e.
BTL, E.P rasik planea ona, sei hato'o karta ida ba parte seguransa PNTL Munisípiu Díli no Aileu nian, atu bele asegura fatin refere. Alende ne'e, sei harii mos postu ba tékniku operadór sira iha fatin ne'e, hodi opera no kontrola iha intake Tohumeta.
Alende ne'e mos, iha tempu badak, BTL, E.P sei halo inspesaun ikus, molok kompañia implementadór entrega sistema nee mai BTL, EP hodi halo operasaun no manutensaun iha futuru.
Enkuantu intake Tohumeta ne'e, iha futuru sei utiliza hodi fornese bee ba komunidade sira iha kapitál Díli. Tanba ne'e, BTL, E.P nafatin husu ba publiku, liu-liu joven ho labarik sira atu labele haris ou asesu ba fatin ne'e.
Fahe ba Sosial Media:
