饾悆饾悽虂饾惀饾悽, 饾煄饾煋 饾悈饾悶饾惎饾悶饾惈饾悶饾悽饾惈饾惍 饾煇饾煄饾煇饾煍. Ekipa DEI Bee Timor-Leste, Empreza Públika (BTL, E.P) no MOP akompaña parte Diresaun Nasionál Transporte Terrestre (DNTT) no PNTL liu-liu Polísia Unidade Tránzitu Munisípiu Díli, hahú desviu dalan temporáriu hosi diresaun BNU nian bá Colmera nomos hosi diresaun Liceu nian bá Pateo kruzamentu Colmera, ligadu ho servisu projetu konstrusaun drenazen D4 nian, hosi Porto Díli bá Caicoli.
Ohin, ekipa konjunta tun direta ba terrenu, hodi orienta transporte públiku no privadu sira ne’ebé hala’o movimentasaun hosi diresaun ne’ebé mensionadu iha leten, atu liuhosi dalan alternativa, nune’e bele asegura nafatin sirkulasaun transporte la’o normál.
Razaun desviu dalan provizória iha área referida, hodi fó kondisaun ou espasu ba kompãnia konstrutór atu implementa projetu drenazen D4, liu-liu segimentu datoluk no dahaat nian.
Movimentasaun transporte sei normaliza hikas, hafoin servisu drenazen segimentu 3 no 4 finaliza. Tanba ne’e husu ba públiku atu koopera no pasiénsia hodi hein servisu ne’e to’o remata.
Fahe ba Sosial Media:
