𝐋𝐚𝐥𝐞𝐢𝐚, 𝐒𝐚́𝐛𝐚𝐝𝐮 𝟐𝟔 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔
Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu, Tékniku, José Filipe Ximenes Smith no Vise-Prezidente KE BTL, E.P ba Korporativu, Manuel Tomás Amaral de Carvalho, hamutuk ho Diretór Enjeñaria no Investimentu (DEI), João da Cruz Cardoso, Diretór Operasaun no Manutensaun (DOM), Aleixo dos Santos, Jestór, Jestora, Koordenadór, Koordenadora nomos funsionáriu BTL, E.P Nasionál no Munsipál, partisipa iha misa agradesimentu aniversáriu ezisténsia BTL, E.P nian ba dala-VI, iha Parókia Nossa Senhora do Rosário Laleia, munisípiu Manatuto.
Iha omilia selebrante, Frei Florindo Falo destake bee nudár símbulu juventude no moirs nian, bee moos mak direitu moris nian ne’ebé Maromak fó no bensaun báziku atu sustenta moris nomos bee mak sei traforma moris sai di’ak, ho nune’e bee moos ne’ebé ohin BTL, E.P atu entrega, nudár sinál moris hosi Kristu nia mate.
Amu Vigáriu Parókia Nossa Senhora do Rosario Laleia deskreve mos, durante ne’e populasaun Laleia halerik ba bee moos no tenke asesu ou ba kuru bee iha mota, maibé ho grasa Maromak nian liuhosi BTL, E.P ohin, povu Laleia bele hetan bee moos. Tanba ne’e, Padre selebrante husu ba populasaun Laleia atu uza bee ho matenek no labele estraga.
Atu konklui omilia, Padre selebrante agradese ba Prezidente BTL, E.P ho funsionáriu tomak nia servisu sira, ohin bele entrega no fornese ona bee moos ba Laleia. Reza no husu nafatin Maromak nia tulun, atu haraik isin di’ak no vida naruk, hodi serví povu Timor-Leste liuhosi domin no servisu sira hirak ne’ebé BTL, E.P sei realiza.
Iha oportunidade ne’e,Vise-Prezidente KE BTL, E.P ba Asuntu Tékniku, José Filipe Ximenes Smith lori BTL, E.P nia naran, hato’o profundu agradesimentu ba Amu Vigáriu Parókia Nossa Senhora do Rosario Laleia nia disponibilidade no bele konsidera BTL, E.P nia pedidu, hodi selebra misa agradesimentu espesiál ba loron ezisténsia BTL, E.P nian, iha Parókia Laleia.
Vise-Prezidente KE BTL, E.P ba Asuntu Tékniku konsidera, iha esplikasaun ohin nian, reflete duni ba BTL, E,P nia knaar, maske BTL, E.P seidauk realiza buat barak no buat hotu ba povu iha Timor-Leste (TL), maibé ho Maromak nia grasa, atu nafatin akompaña, fó isin di’ak no haraik matenek, hodi kontinua hala’o servisu, atu serbí povu no nasaun ida ne’e.
Misa agradesimentu loron ezisténsia BTL, E.P nian tinan ne’e realiza iha Postu-administrativu Laleia, tanba iha loron hanesan sei hala’o mos inaugurasaun projetu sistema fornsimentu bee moos, iha Postu refere.
Rekorda mos katak, Bee Timor-Leste, Empreza Públika (BTL, E.P) transforma hosi Diresaun-Jerál Bee no Saneamentu (DGAS, sigla portugés) iha loron 25 fulan setembru tinan 2021, nune'e horseik loron 25 fulan setembru tinan 2026 ne’e, hakat ona ba tinan VI.
Partisipa iha misa agradesimentu ne’e, Administradór Postu-administrativu Laleia, Frater PNTL Eskuadra Postu Laleia nomos sarani/komunidade Laleia.
Fahe ba Sosial Media:
