Díli, 22/08/2022, I Vise-Prezidente Komisaun Ezekutiva (K.E) BTL, E.P, Sr. Gustavo da Cruz, akompaña hosi ekipa jurídiku/legál BTL, E.P nian, partisipa iha aprezentasaun hosi ekipa Autoridade Nasionál Petróleu no Minerál (ANPM), Ministériu Petróleu no Minerais (MPM) ne’ebé lidera hosi Vise-Prezidente ANPM, ba Asuntu Esplorasaun no Esploitasaun Minerál, José Gonçalves, kona-bá Konsultasaun Área Preliminares ba Atividade Mineiras, Haktuir Lei nú. 12/2021, 30 de junho de 2021, kona-bá Kódigu Mineiru. No atividade ne’e, realiza iha salaun enkontru Gabinete Ministériu Obras Públikas (MOP), Caicoli, Díli.
Objetivu hosi aprezentasaun ne’e, hodi halo konsultasaun no koordenasaun hodi partilla Lei refere ho Instituisaun Públiku nomos Empreza Públika sira ne’ebé tutela iha MOP, nune’e bele rona no hetan feedback ou komentáriu balun kona-bá sira-nia insfraestrutura ne’ebé implementa hela no planu prioridade balun, hodi nune’e, ANPM-MPM bele tau iha konsiderasaun, molok halo abertura ba atividade esplorasaun mineiras iha Teritoriu, iha zona sira ne’ebé ANPM - MPM identifikadu ona iha rekursu mineiras ne'ebé mak durante ne liuhosi estudu no survey tékniku viável, nune’e bele minimiza konflitu em termos de prioridade ba uzu espasu nomos minimiza impaktu investimentu ne'ebé mak regulariza hosi Lei nù 12/2021 publikadu no tama iha vigór, iha fulan Janeiru tinan 2022 ne'e.
Durante iha atividade konsultasaun ne’e, I Vise-Prezidente K.E BTL, E.P hato’o komentáriu kona-bá infraestrutura no planu dezeñu sira nomos sistema bee moos ne’ebé eziste iha postu-administrativu no munisípiu sira, nune’e ho informasaun ne’ebé partilla ANPM-MPM bele tau iha konsiderasaun, molok implementa investimentu kona-bá atividade esplorasaun mineira.
Hafoin hetan feedback ou komentáriu no informasaun hosi BTL, E.P, ANAS, I.P, EDTL E.P, no ANE, I.P, parte ANPM-MPM simu, hodi tetu no ANPM-MPM mos solisita ba entidade sira, atu oferese/fahe dadus GIS hanesan dezeñu ba pontu lokalizasaun infraestrutura projetu ou planu ba sistema bee hosi BTL, E.P nian ne’ebé eziste ona nomos dadus seluk hosi parte sira seluk, atu nune'e bele hatama ba iha mapa hosi bloku A to'o bloku G ne’ebé identifikadu katak iha mineriu sira ne'ebé mak prepara ona hosi ANPM-MPM, hodi tau sinál, mak foin bele deside katak atu esklui ka bele avansa/kontinua, wainhira avansa mak infraestrutura hirak ne’e hetan estragus, mak investidór sira iha obrigasaun hodi hadi’a hikas estragus refere no sei hetan kontrolu liuhosi akta kontratuál sira.
Atu konklui, Vise-Prezidente ANPM-MPM apresia tebes ba feedback pozitivu sira hosi parte hotu, tamba bele hetan informasaun hodi apoia atividade sira, hatuur iha Lei nú. 12/2021, hodi loke sira nia hanoin, oinsá bele jere alokasaun espasu ba área refere.
Hafoin konsultasaun ho membru governamentál sira ne’ebé relevante, ANPM-MPM sei prepara proposta ba Konsellu Ministru (KM) hodi hetan aprovasaun bazeia ba Lei nú. 12/2021 kona-bá abertura área ba atividade esplorasaun ba mineiras iha Teritóriu Timor-Leste.
Fahe ba Sosial Media:
