Viqueque, 07/10/2022, Tékniku Bee Timor-Leste, Empreza Públika (BTL, E.P) munisípiu Viqueque akompaña hosi delegasaun suku, halo survey ba bee matan Menek ne’ebé lokaliza iha área Lacluta, munisípiu Viqueque.
Objetivu hosi survey ne’e, hodi haree besik liu bee matan refere, tamba BTL, E.P planeia atu kanaliza bee matan ne’e ba sentru Wekfia, Lacluta, hodi fornese bee ba komunidade sira, iha área ne’e.
Molok tun ba terrenu hodi halo’o atividade survey ne’e, ekipa BTL, E.P munisípiu Viqueque hala’o uluk enkontru ho autoridade lokál sira iha fatin refere, hodi halo koordenasaun no esplika ba sira kona-bá prezensa BTL, E.P nian iha fatin ne’e, hafoin atu remata autoridade lokál sira apresia no sira prontu koopera ho BTL, E.P, hodi hala’o atividade iha sira nia suku.
Koordenadór BTL, E.P munisípiu Viqueque informa, tuir planu iha tempu besik, ekipa Enjeñeiru hosi Diresaun Enjeñaria no Investimentu (D.E.I) BTL, E.P Nasionál sei dezloka ba munisípiu Viqueque hodi halo survey detalla kona-bá bee matan ne’e, oinsá atu utiliza rekursu bee ne’ebé iha hodi kanaliza ba sidade, hodi fornese ba komunidade sira ne’ebé seidauk asesu ba bee moos.
Fahe ba Sosial Media:
