๐๐ขฬ๐ฅ๐ข, ๐๐ ๐
๐๐ฏ๐๐ซ๐๐ข๐ซ๐ฎ ๐๐๐๐. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, José Filipe Ximenes Smith hamutuk ho Jestór DAK, Ofisiál Legál ho ekipa DAK BTL, E.P, sosializa regulamentu ne’ebé abrigu iha Dekretu Lei no Diploma Ministeriál sira kona-bá tabela tarifária, proibisaun ba koneksaun ilegál no kritéria atu sai kliente BTL, E.P nian, iha aldeia Moris ba Dame, suku Bairo-Pité, Postu-administrativu Dom Aleixo, Munisípiu Díli.
Iha atividade sosializasaun ne’e, BTL, E.P partilla informasaun detalla Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Realizasaun atividade sosializasaun ne’e ho objetivu, hodi partilla uluk informasaun kona-bá, knaar BTL, E.P nian no regulamentu sira ne’ebé sita ona iha leten ba abitante sira, atu nune’e sira bele entende nomos husu sira-nia kolaborasaun no apoiu, molok tékniku sira tun bá halo servisu melloramentu sistema kanalizasaun bee, iha aldeia ne’e.
Iha abertura ba atividade ne’e, Vise-Prezidente KE BTL, E.P ba Asuntu Tékniku hatete, BTL, E.P akompaña sno rona komunidade sira-nia preokupasaun kona-bá problema bee. Tanba ne’e ohin, BTL, E.P mai hakbesik iha aldeia ne'e, hodi rona direta nomos partilla uluk regulamentu no kritéria sira no informa uluk ba lideransa komunitária no abitante sira, hodi hetan konkordánsia no apoia, nune’e wainhira tékniku sira tun mai halo servisu iha terrenu, labele iha intervensaun ruma hosi komunidade.
Durante iha atividade sosializasaun ne’e, lideransa suku no komunidade sira hato’o sira-nia preokupasaun sira ne'ebé durante ne'e sira enfrenta iha aldeia ne'e, liu-liu problema bee moos, rekomendasaun no susjestaun balun. BTL, E.P anota no sei haree oinsá bele halo intervensaun, hodi responde ba kestaun hirak ne’e.
Partisipa iha atividade sosializasaun ne’e, OPS, reprezentante Komandante PNTL Eskuadra Dom Aleixo, reprezentante Lideransa Komunitária no abitante sira hosi aldeia Moris ba Dame.
Fahe ba Sosial Media:
