BTL, E.P Sosializa Informasaun hodi Implementa Projetu Melloramentu Sistema Fornesimentu Bee Moos iha PA Iliomar
Lautém, 04/02/2025, Vise-Prezidente Komisaun Ezekutiva BTL, E.P, ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva BTL, E.P, ba Asuntu Korporativu, Sr. Manuel Tomás Amaral de Carvalho, akompana Diretór Diresaun Engenaria no Investimentu BTL, E.P, João Cardoso, Engineru, Kordenadór ho ekipa, hala'o enkontru ho autoridade Postu Administrativu Iliomar no Autoridade seguransa, ne'ebé realiza iha Administrasaun Iliomar.
Administrador postu administrativu iliomar, Fernando Cardoso de Deus "Teky" hatete, durante tinan barak, komunidade sira sofre no preokupa tebe ba bee, liu-liu abitante sira, ne'ebé pertense ba suku haat hanesan , Iliomar I, Iliomar II, Ailebere no Fuat.
Administrador ne'e agradese ba BTL, E.P, tamba deside hodi hakat too mai iliomar, atu hatene ho di'ak, kona-bá problema bee moos iha iliomar, ne'ebé populasaun sira enfrenta hela.
Líder máximu iha postu ne'e, husu ba BTL, E.P, atu aselera prosesu tomak, nune'e komunidade iha iliomar bele konsumu bee moos, tamba tinan barak too momentu ida ne'e, sei hadau malu nafatin ba bee no dala ruma inan feto sira trata malu, hodi mosu dezentedimentu, tamba ne'e bee moos konsidera ne'e preokupasaun boot ba komunidade durante ne'e.
"Dadaun ne'e ami iha sistema bee lao hela, maibé dala ruma fahe orariu, loron rua maka distribui ba populasaun sira, tan husu ba BTL, E.P nia prejensa iha fatin ida ne'e katak, hanesan administrador hamutuk ho komunidade sira ho esperansa katak, loron ida sei konsumu bee moos no abitante sira asesu bee la hadau malu tan".
Iha fatin hanesan, Adjuntu Komandante Eskudra PNTL Postu Administrativu Iliomar, Sabino Oliveira informa, hosi parte autoridade PNTL, ne'ebé kolokadu ona iha kada postu hotu-hotu iha territóriu nasional inklui Postu Administrativu iliomar, sempre apoia ba programa no planu ne'ebé maka atu realiza, liu-liu postu iliomar, ne'ebé dadaun ne'e, BTL, E.P atu implementa projetu bee iha postu ne'e rasik, sei apoia ho máximu.
Nune'e mos atu garante liu tan ba prosesu implementasaun projetu ne'e, PNTL mos aloka ona pessoal OPS iha kada Suku, hodi bele akompana ba servisu diariamente, iha terrenu.
Wainhira iha difikuldade ruma Ofisial Polisia Suku, iha obrigasaun atu bele rezolve ka fo solusaun, maibé kestaun hirak ne'e, OPS la konsege rezolve maka Komandu iha Eskudra no Munisipal prontu buka solusaun ba populasaun sira nia nesesidade.
Adjuntu PNTL Eskudra Iliomar afirma katak, PNTL iha komprimisu, tenki apoia no asegura ba planu no programa, ne'ebé governu sentral, liu hosi BTL, E.P trasa ona, liga ba bee moos, ne'ebé maka tinan barak komunidade iha postu administrativu iliomar enfrenta hela.
"Hanesan mos Iliomar oan, hau hatene komunidade sira persija tebes-tebesbee, tamba bee iha importante ba populasaun sira inklui balada no ai horis sira mos persija, tan ne'e kontribui hodi fo susesu ba obra ne'e.
Vise-Prezidente KE BTL, E.P ba Asuntu Korporativu, apresia tebes-tebes ba administrador postu administrativu iliomar no adjuntu Komandante PNTL Eskudra Postu Administrativu iliomar, tamba fo korajen ba engineiru no tékniku sira hosi nasional no munisipal, hodi halo servisu ho di'ak.
Vise-Prezidente KE BTL, E.P, ba Asuntu Korporativu, Sr. Manuel Tomás Amaral de Carvalho informa, hosi parte Vise-Prezidente KE BTL, E.P, ba Asuntu Korporativu maka oinsa halo polítika atu finansia orsamentu ba obra infraestrutura hirak, ne'ebé sei implementa iha territóriu nasional inklui mos postu administrativu iliomar.
"Ha'u hatene iha Munisípiu Lautém, ema hotu-hotu iha hanoin di'ak no iha sivilizasaun, hodi define interese komum ka interese estadu, liu-liu kontribui ba dezenvolvimentu iha setór bee no saneamentu".
Ezekutivu ne'e realsa, projetu ne'e la'o komunidade sira persija kopera, maibé labele halo impedimentu ba prosesu implementasaun, tamba nasaun no estadu ida ne'e, labele sai inferior ba grupu kiik oan ida, maibé estadu iha prinsipiu ida hodi hatutan herói sira nia luta ba ukun rasik, iha ne'ebé postu administrativu iliomar mos hola parte ida ne'e, ho nune'e fiar katak sei bele servisu hamutuk diak liu, hodi lori nesesidade bazíka ne'e ba populasaun sira.
Nune'e mos Vise-Prezidente KE BTL, E.P, ba Asuntu Tékniku, Sr. José Filipe Ximenes Smith, agradese ba administradór no Adjunto Komandante Eskudra Postu Iliomar, tamba sei apoia BTL, E.P nia programa, ne'ebé maka sei implementa iha fatin ida ne'e, bele tuir ona BTL, E.P nia espetativa ba futuru.
Vise-Prezidente KE BTL, E.P, senti kontente, tamba bele hetan autoridade, ne'ebé iha iha vontade tomak, hakarak kontribui no iha komprimisu atu apoia servisu ba projetu bee moos, nune'e konsidera lideransa ida ne'e bele sai ezemplar ba autoridade sira, iha fatin seluk, hodi fo biban ba BTL, E.P bele aselera servisu liga ba bee.
"Ami nia prejensa ne'e rona novidades pozitivu, tamba administradór no parte seguransa laiha dúvidas no la tau ba kestaun, maibé realmente apoia ba projetu ida ne'e, bele realiza iha tinan ne'e".
Reuniaun ne'e, nu'udar meius ida, atu halo aproximasaun direita, hodi rona rasik, ideia, hakarak, impresaun, hodi bele kopera hamutuk, atu bele mellora sistema bee iha postu ida ne'e, lao ho di'ak.
Ezekutivu ne'e iha esperansa katak, projetu ne'e implementa sei garante projetu ida ne'e, laiha impedimentu maka liu hosi partilla informasaun hirak ne'e, bele iha ona intedimentu ba prosesu ida ne'e, tau forsa hamutuk, hodi tau matan. Tamba iha fatin balun, konsola malu ona, maibé dala ruma mosu fali impedimentu, hodi prejudika projetu lao tarde, maka sei fo sinal negativu ba komunidade sira katak, kontinua sofre ba bee.
Vise-Prezidente KE BTL, E.P, ba Asuntu Tékniku mos husu ba administradór ho Xefe Suku sira, atu hare kestaun ba sosiál, ne'ebé dala barak sistema kanalizasaun afeta ba ai- horis ka kintal ruma bele kontribui, fo espasu hodi installa lina transmisaun no distribuisaun.
Iha sosializazaun ne'e, partisipa máximu hosi Xefe Suku, entidade sira iha postu administrativu Iliomar.
Fahe ba Sosial Media:
