Díli, 11/08/2022, Prezidente Komisaun Ezekutiva BTL, E.P, Eng. Carlos Peloi dos Reis, akompaña hosi I Vise-Prezidente K.E BTL, E.P Sr. Gustavo da Cruz ho ekipa Juídiku/Legál BTL, E.P asina akordu kooperasaun ho Universidade Nasionál Timor Lorosa’e (UNTL) ne’ebé mak partisipa mos hosi Ministru Obras Públikas (MOP) S.E Eng. Abel Pires da Silva ne’ebé sai mos nu’udár sasin iha asina akordu refere no seremónia ne’e rasik selebra iha Sala Vídeo Konferénsia, UNTL.
SPrezidente K.E BTL, E.P hatete, selebrasaun akordu kooperasaun ne’e ho objetivu, atu fasilita estudante sira hosi UNTL, hodi halo estájiu no peskiza, atu hakle’an sira nia koñesimentu iha setór bee no saneamentu, nune’e mos estudante sira bele prátika sira-nia koñesimentu ne’ebé sira hetan iha universidade.
“Ita formaliza kooperasaun ida ne’e, nune’e hodi fasilita ita nia estudante sira husi UNTL hodi halo estájiu no peskiza, iha BTL, E.P ho intensaun atu fasilita sira hodi hakle’an sira nia koñesimentu iha setór bee no saneamentu, liu-liu oinsá instituisaun BTL, E.P ninia lala’ok servisu hodi asegura fornesimentu bee no saneamentu ba komunidade sira, daruka nian, BTL, E.P aproveita estudante sira-nia prezensa ne’e, hodi rona sira-nia hanoin ou input, oinsa ita mellora servisu ne’e di’ak liu tan iha futuru, alende ne’e, hanesan parte ida, hodi prepara ita nia jerasaun foun sira, atu aban bainrua to’o sira prontu atu bele asumi responsabilidade hala’o servisu ba oin, tamba ne’e, ha’u hanoin ida ne’e ideia di’ak tebes entre BTL, E.P ho UNTL no hein katak kooperasaun ida ne’e bele mellora servisu BTL, E.P nian di’ak liu tan no bele fasilita estudante sira bele apreende di’ak liu tan”, dehan Prezidente Komisaun Ezekutiva BTL, E.P.
Iha sorin seluk, Magnífiku Reitór UNTL, João Soares Martins hatete, UNTL iha interese boot hakarak halo kooperasaun ho BTL, E.P tamba estudante sira iha fakuldade ezata ne’ebé apreende téoria no prátika oinsa atu halo teste kona-bá kualidade bee nune’e kooperasaun ida ne’e importante tebes, atu bele halo relasaun ne’ebé íntima no produtivu liu tan.
“Ohin UNTL asina MoU ho MOP nomos ho Bee Timor-Leste, UNTL iha interese boot tebes atu halo kooperasaun MOP ho BTL, E.P tamba iha razaun fundamentál, primeira tamba ami iha fakuldade enjeñaria, siénsia no teknolojia nomos fakuldade siénsia ezata, ne’ebé mak forma enjeñeiru sira iha área enjeñaria sivil, informátika, mekánika jeolojia nomos iha fakuldade siénsia ezata ne’ebé mak forma graduadu sira ba lisensiatura ba fízika, matemátika no kímika, fakuldade rua ne’e importante teb-tebes em termos de prepara rekursu umanu ba infraestrutura iha nasaun Timor-Leste (TL). Entaun MOP ami nia parseiru importante, tamba maioria graduadu husi fakuldade rua ne’e aban bainrua sira barak sei bele servisu iha ministériu ne’e, nomos servisu iha empreza ne’ebé involve iha área infraestrutura, ne’ebé akordu ne’e importante teb-tebes no espera katak asinatura MoU ne’e, bele fasilita estudante UNTL bele ba halo prátika iha MOP no Bee Timor-Leste”, hatete Reitór UNTL.
Iha biban hanesan, Ministru Obras Públikas (MOP), S.E Eng. Abel Pires da Silva iha nia intervensaun agradese ba Prezidente BTL, E.P nia esforsu, ne’ebé bele realiza kooperasaun ho UNTL, ida ne’e konfiansa boot ida ne’ebé bele kontinua mantein, atu oinsá UNTL bele kontinua apoia BTL, E.P, liu-liu ba bee no saneamentu.
Entretantu akordu MoU ne’e ba tempu naruk no bazeia kontratu ne’ebé iha katak, kada fulan haat parte rua sei bele halo revizaun nomos kontratu ne’e liga ba asuntu saida mak BTL, E.P bele halo nomos saida mak UNTL bele halo, nune’e parte rua fahe tarefa ou servisu, signifika wainhira estudante UNTL sira ba estájiu iha BTL, E.P, servisu saida mak BTL, E.P bele prepara, nune’e mos tarefa saida mak UNTL bele halo.
Fahe ba Sosial Media:
