𝐃𝐢́𝐥𝐢, 𝟎𝟒 𝐌𝐚𝐫𝐬𝐮 𝟐𝟎𝟐𝟔. Vise-Prezidente Komisaun Ezekutiva (KE) BTL, E.P ba Asuntu Korporativu, Manuel Tomas Amaral de Carvalho ho Jestór Infraestrutura BTL, E.P, Estélio dos Santos inklui Enjeñeiru DEI akompaña Vise-Ministru ba Infraestrutura (VMI), iha Ministériu Obras Públikas (MOP), Júlio do Carmo, halo monitorizasaun ba implementasaun projetu alargamentu estrada nomos sistema kanalizasaun bee ne’ebé afeta hosi obra estrada, iha Postu-administrativu Soibada no Laclubar, Munisípiu Manatuto.
Vizita ne’e, hodi observa direta progresu servisu fíziku iha terrenu, nune’e bele garante kualidade projetu nomos atu haree direta fasilidade bee ne’ebé hetan estragu, kauza hosi projetu alargamentu estrada iha Postu rua ne’e.
Alende ne’e, BTL, E.P mos koordena ho kompañia ne’ebé ezekuta obra estrada nian, nune’e bele normaliza fila-fali sistema kanalizasaun bee no parte kompañia anota no informa katak, hafoin konstrusaun valeta finaliza, mak foin bele instala hikas kanu bee moos nian.
Iha biban ne’e, Vise-Ministru Infraestrutura esplika mos ba Administradora Postu-Administrativu Soibada, katak prezensa ohin iha Postu ne’e, atu haree rasik kondisaun terrenu no fasilidade bee ne’ebé estragus.
Durante observasaun iha terrenu, identifika katak kondisaun rai ou 𝑚𝑒𝑑𝑎𝑛 mak la permite atu kanaliza kanu bee moos nian, tanba ne’e, husu atu pasiénsia hodi hein to’o servisu valeta ne’e konklui, mak BTL, E.P bele instala no konekta fila-fali fasilidade bee.
Atividade monitorizasaun ne’e, akompaña mos hosi APA Soibada, Komandante PNTL Eskuadra PA Soibada ho nia membru sira nomos BTL, E.P no MOP Munisípiu Manatuto.
Fahe ba Sosial Media:
