Díli, 06/03/2024. Vise-Prezidente Komisaun Ezekutiva Bee Timor-Leste Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz partisipa iha atividade “Lansamentu Relatóriu Auditoria Sosiál liuhosi mekanizmu Kartaun Pontuasaun Komunidade (KPK), Fornesimentu Bee ba Komunidade sira iha área Rurál”, ne’ebé realiza iha salaun Asosiasaun HAK.
Atividade lansamentu relatóriu ne’e, hodi hato’o rezultadu deskobrimentu ne’ebé PN-BESI-TL produz ona, liuhosi atividade auditoria sosiál kona-bá sistema bee rurál, ne’ebé kontinua sai problema. Tanba ne’e, liuhosi aprezentasaun rezultadu deskobrimentu ne’e, hodi kontinua halo advokasia ba governu no parlamentu nasionál nomos ba entidade relevante sira, atu tau investimentu ne’ebé sériu ba dezenvolvimentu iha setór bee moos no saneamentu iha Timor-Leste (TL).
Prezidente PN-BESI-TL hatete bazeia ba deskobrimentu ne’ebé mak iha, sistema fornesimentu bee no saneamentu iha área rurál sira, seidauk adekuadu, seguru no seidauk asesível ba komunidade sira. Hanesan iha suku haat, iha postu-administrativu Tilomar, munisípiu Covalima, komunidade seidauk asesu ba bee moos. Tanba ne’e, liuhosi rezultadu deskobrimentu ida ne’e, governu bele tau iha konsiderasaun, atu bele aloka Orsamentu Jerál Estadu (OJE) kada tinan ba iha setór bee no saneamentu, hodi hadi’a problema iha setór ne’e.
Iha okazisaun ne’e, Vise-Prezidente Komisaun Ezekutiva Bee Timor-Leste Empreza Públika (BTL, E.P) ba Asuntu Sistema Bee, Saneamentu no Drenajen em nome BTL, E.P agradese ba PN-BESI-TL tanba bele fahe informasaun sira kona-bá dezenvolvimentu no dezafiu sira iha setór bee no saneamentu nian. Atu nune’e, parte relevante bele tau iha konsiderasaun ou bele foku ba kestaun hirak ne'e.
Hatan ba kestaun bee moos iha postu-administrativu Tilomar nian, Ezekutivu BTL, E.P ne’e informa, ba postu-administrativu Tilomar iha ona faze dezeñu, maibé problema mak rekursu bee liuhosi sistema gravitasaun nia kuantidade la to’o atu kanaliza ou fornese ba postu Tilomar tomak. No daudaun ne’e, BTL, E.P halo hela levantamentu tékniku atu halo perfurasaun iha postu refere, maibé kestaun seluk ne’ebé enfrenta mak área ne’e iha kontaminasaun, tanba ne’e BTL, E.P sei servisu hamutuk ho parte relevante hodi identifika loloos pontu ne’ebé bele halo perfurasaun hodi hetan rekursu bee, nune’e bele implementa projetu kanalizasaun bee moos iha Tilomar.
Iha biban ne’e, PN-BESI-TL halo mos aprezentasaun ba rezultadu deskobrimentu sira no lansa mos relatóriu auditoria sosiál. Entidade sira ne’ebé partisipa iha atividade lansamentu ne’e, mai hosi parte SASCAS, FONGTIL, DNRAS BTL, E.P rasik nomos partisipante sira seluk.
Fahe ba Sosial Media:
