Díli, 02/08/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, akompaña hosi Jestór Operasaun no Manutensaun BTL, E.P partisipa iha enkontru grupu tékniku ba identifikasaun infraestrutura ne’ebé destruídu no danifikadu hosi inundasaun ne’ebé akontese iha loron 02 to’o 07 fulan jullu tinan 2023 ne’e, iha munisípiu ualu. Reuniaun ne’e, realiza iha salaun enkontru gabinete Ministériu Obras Públikas (MOP), Caicoli, Díli.
Reuniaun ne’e hodi halo koordenasaun ba rekonstrusaun ou reabilitasaun ba infraestrutura no ekipamentu públiku sira ne’ebé hetan estragu iha fulan kotuk. No ko'alia mos prosesu preparativu balun ne’ebé grupu tékniku sira sei tun ba terrenu hodi halo levantamentu tékniku ba infraestrutura no ekipamentu públiku sira ne'ebé estragu ne’e.
Maske BTL, E.P la hola parte iha grupu tékniku ou la sai hanesan membru iha grupu tékniku ne’e, maibé membru ne’ebé sita iha despaixu S.E Primeiru Ministru ba kriasaun grupu tékniku ne’e, hakarak konvida mos parte relevante sira inklui BTL, E.P, hodi bele partisipa iha sorumutu ne’e, atu fó ideia ligadu ho infraestrutura no ekipamentu públiku ne’ebé destruídu ne’e ou karik iha sistema bee ne’ebé mak hetan estragu iha dezastre naturál ne'e bele informa mos iha sorumutu refere. Maibé parte BTL, E.P rasik informa katak, sistema BTL, E.P nian ne’ebé hetan estragu iha dezastre naturál liu ba, BTL, E.P rasik halo ona intervensaun, tanba ne'e prezensa BTL, E.P nian hodi fó de'it opiniaun ligadu ho asuntu ne'ebé mensiona ona iha leten.
Entidade sira ne'ebé mak partisipa iha enkontru koordenasaum ne'e, mai hosi Gabinete MOP, DGPOFA-MOP, ADN, I.P, BTL, E.P rasik, IGE-ADI, I.P, ANLA, I.P IPG, I.P no entidade relevante sira seluk.
Fahe ba Sosial Media:
