Díli, 30/09/2024. Vise-Prezidente Komisaun Ezenkutiva (KE) Bee Timor-Leste, Empreza Públika (BTL, E.P), Gustavo da Cruz, partisipa no sai oradór iha Semináriu Nasionál kona-bá Bee, Saneamentu no Ijiene (BESI), Igualdade Jéneru Difisiénsia no Inkluzaun Sosiál (IJDIS) inklui Mudansa Klimátika, ne'ebé realiza iha salaun Esperansa, Fatuhada.
Semináriu Nasionál ne'e, organiza PN-BESI-TL no abertura direta hosi SEAAS ho objetivu atu hasa’e koñesimentu públiku, liu-liu entidade relevante sira, hodi tau prioridade ba setór Bee, Saneamentu no Ijiene (BESI), Igualdade Jéneru Difisiénsia no Inkluzaun Sosiál (IJDIS) inklui Mudansa Klimátika iha Timor-Leste no daruak nian, atu entidade relevante sira hanesan Ministériu relevante, NGO nasionál no internasionál, autoridade lokál no estudante ou universitáriu sira iha koñesimentu kona-bá problema no dezafiu sira relasiona ho asuntu Bee, Saneamentu no Ijiene iha TL.
Iha okaziaun ne'e, Vise-Prezidente KE BTL, E.P ba Asuntu Sistema Bee, Saneamentu no Drenajen partilla informasaun liga ba atinjimentu balun, hafoin ezisténsia BTL, E.P durante tinan haat, BTL, E.P halo ona estudu sira ne’ebé hodi guia ba iha investimentu sira liu-liu kona-bá bee moos no drenajen. Ezekutivu esplika, investimentu iha bee no saneamentu ne’e, presiza tempu lubuk ida no etapa importante tolu, hanesan estudu viabilidade, hodi hatene katak bee ne’e sufisiente kalae atu utiliza ba konsumu públiku, etapa daruak nian hakat ba estudu planu mestre nian, hodi hatene kona-bá demanda hosi munisípiu ida-idak ou kapitál nasaun nian, konsumidór atu konsumu bee hira no durante periodu hira. No etapa datoluk nian mak hakat ba dezeñu nian.
Ezekutivu akresenta, bazeia ba orientasaun ou planu negósiu BTL, E.P nian, tuir dekretu lei nú. 4/2004, BTL, E.P foku ba kapitál munisípiu no kapitál postu-administrativu sira. Iha kapitál munisípiu hanesan Manatuto no RAEOA sistema finaliza no entrega ona, fundu grand hosi ADB. Agora iha Manatuto BTL, E.P halo hela jestaun operasionál, maibé Oecusse sai ona rejiaun espesiál, tanba ne’e BTL, E.P labele halo intervensaun iha RAEOA. Ba kapitál munisípiu seluk hanesan Baucau, Viqueque Manufahi no Lautém estudu planu mestre nomos DED finaliza ona no investimentu ba projetu ne’e sei realiza iha tinan ida ne’e ho fundu empréstimu hosi Banku Mundiál no ADB, maibé ho mudansa polítika hosi VIII governu ba IX governu, tanba ne’e governu husu atu halo suspensaun ba empréstimu refere, ho nune’e to’o ohin loron labele implementa investimentu hirak ne’e. inklui ba kapitál Díli, maibé dezeñu DED hotu ona. Enkuantu ba kapitál munisípiu neen seluk, Ainaro, Aileu, Ermera, Liquiça, Bobonaro no Covalima planu mestre finaliza ona no foin atu avansa ba DED.
Enkuantu ba kapitál postu-administrativu sira, daudaun ne’e BTL, E.P implementa hela projetu sistema bee, iha ne’ebé nia obra fíziku la’o hela iha terrenu no projetu tolu mak finaliza no inaugura ona mak iha PA Vemasse, Cailaco no Maubara. Projetu sistema bee sira ne’ebé implementa iha PA sira, sei transforma hosi sistema rurál ba sistema urbana, katak kanalizasaun bee direta ba populasaun ida-idak nia hela fatin, monta mos ho metru kontadór no ekipa BTL, E.P rasik mak jere ou garante nia sustentabilidade operasaun no manutensaun ba sistema iha PA hirak ne’e.
Durante iha semináriu nasionál ne'e, iha mos aprezentasaun hosi parte relevante sira hanesan, BTL, E.P aprezenta kona-bá "Fornesimentu Bee no Saneamentu ba Komunidade sira (Progresu no Dezafiu sira)". DNRAS nian kona-bá "oinsá polítika governu nian liuhosi DNRAS ba dezenvolvimentu ne'ebé integradu ba setór bee no saneamentu liga ba Igualdade Jéneru Difisiénsia no Ingluzaun Sosiál nomos mudansa klimátika iha área rurál no urbana (Lei no Polítika sira) Dekretu Lei nú. 4/2004, Polítika abastesimentu bee no Polítika Jestaun Rekursu Ídriku" no WaterAid TL (WATL) ko'alia kona-bá "Bee, Saneamentu no Ijiene integra ba Asuntu Igualdade Jéneru Difisiénsia no Ingluzaun Sosiál nomos mudansa klimátika iha Timor-Leste" PN-BESI-TL, Bee, Saneamentu no Ijiene nudár Direitu Umanu (Direitos Humanos)
Entidade sira ne'ebé partisipa iha semináriu nasionál ne'e, mai hosi BTL, E.P rasik, SEEAS, DNRAS, NGO nasionál no internasionál, lideransa suku, universitáriu sira hosi Universidade UNTL, UNPAZ, UNDIL no partisipante relevante sira seluk.
Fahe ba Sosial Media:
