Viqueque, 05/01/2023, Tékniku Operadór (TO), Bee Timor-Leste, Empreza Públika (BTL, E.P) munisípiu Viqueque hakotu koneksaun bee ilegál iha zona Beloi postu-administrativu Viqueque Villa, munisípiu Viqueque.
Tuir informasaun hosi Terrenu katak, tékniku sira identifika iha komunidade balun halo koneksaun bee ilegál, tanba ne’e tékniku sira tun ba terrenu hodi halo konfirmasaun ho komunidade ne’e, hodi hakotu koneksaun ilegál ne’e.
Molok dezliga ligasaun bee ilegál ne’e, tékniku operadór sira halo uluk aproximasaun hodi esplika kona-bá aktu ne’ebé abitante ne’e komete, ikus mai iha konkordánsia hodi hakotu koneksaun ilegál refere. alende ne’e, konsumidór ne’e rasik koopera no aseita ona atu bá halo rejistu iha edifiísiu BTL, E.P, atu nune’e tékniku BTL, E.P nian bele halo ligasaun bee ba abitante ne’e nia hela fatin, tuir padraun ne’ebé mak eziste ona.
Atu ó hanoin fali katak, bazeia ba Diploma Ministeriál nú. 4/2004 de 11 de Fevereiro, artigu 27 nú 1, alinea e, ne’ebé ko’alia kona-bá labele uza mákina ou sanyo hodi liga ho ilegalmente ba kanu transmisaun no distribuisaun bee nian. Nomos Diploma Ministeriál nú. 4/2004 de 11 de Fevereiro, iha artigu 14 nú. 1 alinea d sita mos kona-bá ligasaun ilegál.
Regras hirak ne’e, bandu atu ema labele halo ligasaun bee ho ilegalmente, tantu liuhosi uza mákina ou sanyo nomos fura ku’ak kanu transmisaun no distribuisaun nian, tamba aktu hirak ne’e, kontribui hamenus presaun bee, nune’e bee la sufisiente ba ema hotu.
Relasiona ho kestaun ne’e, BTL, E.P nafatin husu ba komunidade sira atu koopera, hodi labele prátika bebeik aktu koneksaun bee ho ilegalmente, atu nune’e bee bele to’o ba ema ou ema hot-hotu bele asesu bee ne’ebé hanesan.
Fahe ba Sosial Media:
