Manufahi, 30/11/2022, Tékniku Operadór (TO) Bee Timor-Leste, Empreza Públika (BTL, E.P munisípiu Manufahi normaliza kanu transmisaun bee DN 100, iha postu-administrativu Same, munisípiu Manufahi.
Tuir informasaun hosi BTL, E.P munisípiu Manufahi katak, kanu ne’ebé tékniku sira halo manutensaun ne’e intupidu, nune’e afeta direta ba sirkulasaun bee ba rezervatóriu Luak, tanba ne’e, tékniku operadór sira hetan orientasaun hodi mobiliza material, tun kedas ba terrenu hodi halo intervensaun ba estragus ne’e, atu bele garante bee ba komunidade sira.
Atu normaliza intupidu refere, tékniku sira tenke sobu kanu hodi hamoos foer ou sedimentasaun ne’ebé taka metin kanál sirkulasaun bee, hafoin mak monta ou solda hikas fali liña transmisaun refere.
Koordenadór BTL, E.P Manufahi informa, hafoin normalizasaun kanu transmisaun ne’e, distribuisaun bee hosi kanu refere ba rezervatóriu Luak la’o ho di’ak no bele fornese hikas bee ba konsumidór sira.
Fahe ba Sosial Media:
