Manufahi, 10/01/2023, Tékniku Opreadór (TO), Bee Timor-Leste, Empreza Públika (BTL, E.P) munisípiu Manufahi solda kanu transmisaun bee DN 150, Merbuti ne’ebé lokaliza iha aldeia Cotalala, suku Letefoho, postu-administrativu Same, munisípiu Manufahi.
Tuir informasaun hosi BTL, E.P Manufahi katak, liña transmisaun ne’e tohar ou kotu kauza hosi udan boot ne’ebé provoka rai mamar nune’e rai no fatin monu konak anu refere, hodi rezulta kanu tohar ou kotu.
Kanu ne’e estraga iha sábado semana kotuk no tékniku sira esforsu hodi halo intervensaun maibé tanba udan boot nune’e tékniku sira labele solda hotu, nune’e horseik mak tékniku operadór sira foin finaliza servisu refere.
Hafoin remata atividade manutensaun ba kanu transmisaun ne’e, sirkulasaun bee hosi bee ulun Merbuti liuhosi liña transmisaun ne’e ba rezervatóriu Tomnamo la’o normál fila-fali no tékniku sira enxe fila-fali bee ba rezervatóriu ne’e, atu nune’e bele garante fornesimentu bee ba komunidade sira, iha área ne’e.
Fahe ba Sosial Media:
