Díli, 09/01/2023, Tékniku Operadór (TO) Bee Timor-Leste, Empreza Públika (BTL, E.P) Zona 2 hadi’a liña distribuisaun bee ou pipe distribuisaun bee NOD 63mm, iha área Ponte Comoro III, postu-administrativu Dom Aleixo, munisípiu Díli.
Pipe distribuisaun ne’ebé hetan estragus ne’e, deskonfia ema deskoñesidu mak sunu, tanba bazeia ba imajen ne’ebé iha, hatudu katak liña distribuisaun ahi han kotu, nune’e rezulta bee sulin estraga iha fatin ne’e, nune’e prejudika konsumidór sira ne’ebé durante ne’e asesu bee hosi liña distibuisaun ne’e, labele hetan bee. Maibé hafoin identifika estragus ne’e, tékniku sira tun kedas ba terrenu hodi troka pipe PE 63mm ho capling PE 63mm foun.
Tuir informasaun hosi terrenu, hafoin manutensaun sirkulasaun bee la’o normál fila-fali no bele distribui ona bee ba komunidade sira. Servisu Manutensaun ne’e hetan apoiu hosi Tékniku Operadór (TO) Zona 6-9.
Durante ne’e, BTL, E.P esforsu hodi halo melloramentu ba sistema bee, hodi garante bee moos ba komunidade sira, maibé iha ema deskoñesidu balun mak seidauk iha konsiénsia hodi nafatin estraga sistema bee ne’ebé instala ona iha sira nia bairo, aldeia no suku.
Ho nune’e liuhosi biban ne’e BTL, E.P nafatin husu ba komunidade sira atu koopera ho BTL, E.P, hodi tau matan ba sistema beee ne’ebé instala ona iha ita boot sira nia bairo, aldeia no suku, nune’e hodi fó tempu ba BTL, E.P atu bele mellora no halo konstrusaun ba sistema bee, iha fatin seluk ne’ebé seidauk asesu ba bee.
Fahe ba Sosial Media:
