Baucau, 03/11/2022, Atu evita ema labele loke no taka válvula arbiru, Tékniku Operadór (T.O) hosi Bee Timor-Leste, Empreza Públika (BTL, E.P) munisípiu Baucau hamutuk ho traballadór Mão de Obra halo servisu hanesan solda no monta box ou kaixa gate válvula, iha Tuanau, área Villa Nova, postu-administrativu Baucau Villa, munisípiu Baucau.
Tékniku ho traballadór sira monta box vávula ne’e, ho objetivu atu asegura válvula, nune’e ema seluk (ema ne’ebé la’ós tékniku hosi BTL, E.P) nomos animál labele estraga válvula refere.
Tuir informasaun hosi Koordenadora BTL, E.P munisípiu Baucau katak, antes ne’e, wainhira seidauk iha box válvula, iha ema deskoñesidu balun ne’ebé mak sempre loke no taka válvula tuir sira-nia hakarak, maske sira la’ós tékniku hosi BTL, E.P, nune’e Koordenadora orienta tékniku operadór servisu hamutuk ho traballadór sira, hodi monta kaixa válvula, nune’e ema sira ne’e labele opera tan valvula ne’e, eseptu tékniku operadór BTL, E.P mak bele halo operasaun ba válvula refere.
Koordenadora hatete, wainhira ema seluk opera livre válvula, prejudika distribuisaun bee ba komunidade sira.
Fahe ba Sosial Media:
