Aileu, 09/11/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Aileu muda kanu distribuisaun bee ba valeta ninin, ne’ebé lokaliza iha aldeia Hularema, munisípiu Aileu.
Tékniku operadór sira muda liña distribuisaun bee ne’e, tamba afeta direta ba konstrusaun bee dalan ou valeta hosi programa PNDS munisípiu Aileu nian, nune’e parte rua koordena hodi halo mudansa ba kanu distribuisaun refere, atu nune’e labele prejudika fornesimentu bee ba komunidade sira ne’ebé durante ne’e asesu bee hosi liña distribuisaun refere, alende ne’e, atu konstrusaun bee dalan ne’e mos bele kontinua.
Tuir informasaun hosi BTL, E.P Aileu katak, hafoin halo mudansa ba liña distribuisaun hirak ne’e, tékniku operadór sira kontinua halo ligasaun bee ba komunidade sira nia uma, iha aldeia Hularema.
Iha biban ne’e moos, tékniku sira kontinua hakat ba mota Mantane hodi observa bee iha mota ne’ebé kontinua merak makaas, kauza hosi udan, ho observasaun ne’e, atu tékniku sira bele asegura no tau atensaun, nune’e tékniku operadór sira labele husik bee merak tama ba posu ou tenke soe sai bee foer, atu nune’e bee merak labele kahur ho bee ne’ebé moos iha sistema ne’e.
Fahe ba Sosial Media:
