Aileu, 03/11/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Aileu halo manutensaun ba kanu distribuisaun bee, iha aldeia Kotbauru, suku Malere, postu-administrativu Aileu Villa, munisípiu Aileu.
Koordenadór BTL, E.P munisípiu Aileu informa, tékniku sira identifika katak, kanu distribuisaun bee ne’ebé estragu ou ku’ak ne’e deskonfia ema deskoñesidu mak fura ku’ak, nune’e prejudika komunidade sira iha fatin refere, durante loron rua labele asesu ba bee moos.
Hafoin tékniku sira identifika kanu estragus ne’e, Koordenadór orienta kedas tékniku sira, hodi halo manutensaun hanesan troka poli ba kanu GS, nune’e garante distribuisaun bee ba komunidade sira.
Tuir informasaun hosi Koordenadór BTL, E.P Aileu katak, hafoin manutensaun, rezultadu sirkulasaun bee la’o normál hikas no tékniku sir abele fornese ona bee ba komunidade sira ne’ebé durante ne’e asesu bee hosi liña distribuisaun refere.
Ho estragus refere, BTL, E.P kontinua husu ba abitante sira, atu kolabora nafatin ho BTL, E.P hodi tau matan ba sistema bee hirak ne’ebé eziste ou instala ona iha ida-idak nia bairo aldeia no suku sira, nune’e labele difikulta komunidade sira seluk, hodi asesu ba bee moos.
Fahe ba Sosial Media:
