Díli, 20/-01/2023, Prezidente K.E BTL, E.P, Eng. Carlos Peloi dos Reis hasoru S.E Primeiru Ministru, Taur Matan Ruak, relata progresu servisu tinan 2022 no mos hato’o planu servisu ba tinan 2023 nian.
Iha reuniaun ne’e, Primeiru Ministru fó orientasaun ba Ezekutivu BTL, E.P atu kontinua servisu makaas, hodi lori bee ba komunidade sira, liu-liu populasaun hirak, ne’ebé seidauk asesu bee. Klaru katak sempre iha dezafiu no problema barak, maibé S.E Primeiru Ministru nafatin fó koragen ba ezekutivu BTL, E.P atu fo hanoin ba funsionáriu sira, atu servisu ho dedikasaun tomak, atu nune’e bele lori bee ba komunidade sira iha territóriu nasionál.
S.E Primieru Ministru mos hato’o dezeju tinan foun ba BTL, E.P, liu-liu ba funsionáriu iha BTL, E.P, atu tau matan ba ida-idak nia saúde, nune’e bele servisu di’ak liu tan, iha tinan ida ne’e no ba futuru.
Prezidente K.E BTL, E.P hatete, tinan ida ne’e ba oin, sei kontinua nafatin indikadór tolu, ne’ebé governu inpoin ba BTL, E.P mak Jere sistema bee iha territóriu tomak, hodi funsiona 24 horas, tamba ne’e ami sei foku liu ba ida ne’e, , reforsa nafatin servisu operasaun no manutensaun ba sistema, liu-liu iha kapitál munisípiu sira, atu bele garante distribuisaun ba komunidade sira, iha munisípiu no mos Díli. Alende ne’e, jere mos sistema saneamentu sira, ne’ebé mak iha, hodi halo tratamentu ba bee foer sira, nune’e labele husik bee foer direita ba ambiente.
Prezidente ne’e afirma, kontinua promove projetu foun hanesan konstrusaun no melloramentu sistema bee moos iha kapitál postu administrativu sira, nune’e bele fasilita mos komunidade sira, hodi asesu bee ho di’ak. Iha tinan kotuk konsege promove projetu foun sira, hamutuk 54, husi númeru ne’e, projetu 24 no suku tolu mak la’o hela ( ongoing ), sei iha kapitál postu administrativu 24 mak halo hela dezeñu detalladu, ne’ebé espera bele implementa iha tinan ne’e, hodi lori ba komunidade sira seluk.
Alende ba projetu iha postu administrativu no suku, BTL, E.P apoiu mos materiál kanu sira ba komunidade, liu-liu ba sistema sira, ne’ebé ki’ik, mak Ezekutivu orienta tékniku sira akompaña komunidade sira, hodi halo instalasaun rasik.
Líder BTL, E.P mos akresenta, ba projetu bo’ot hanesan melloramentu ba sistema bee moos iha kapitál munisípiu sira, ne’ebé iha tinan kotuk halo dezeñu detalladu ba munisípiu lima hanesan Baucau, Manufahi, Lautém, Viqueque no Díli, ne’ebé dadaun ne’e iha hela prosesu ba verifikasaun husi ADN,tamba ne’e Ezekutivu BTL, E.P fiar katak,ADN servisu makaas ba DED, hodi bele lansa projetu melloramentu ba sistema bee moos iha tinan ne’e.
Enkuantu ba munisípiu sira seluk, iha tinan kotuk foin finaliza planu mestre, ne’ebé konklui ona 100%, iha tinan ne’e ba faze dezeñu detalladu, mak finaliza iha tinan ne’e, tinan oin bele lansa mos projetu melloramentu sistema bee moos.
Tinan ne’e mos sei fokus liu ba DED ba sistema saneamentu iha sidade Díli, ne’ebé iha tinan kotuk asina akordu entre governu Timor-Leste ho MCC, atu hadi’a sistema saneamentu no mos estasaun tratamentu bee foer iha Kapitál Díli.
Fahe ba Sosial Media:
