Covalima, 21/06/2024, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, akompaña Diretór Enjeñaria no Investimentu (DEI) ho ekipa enkontru ho funsionáriu BTL, E.P Munisípiu Covalima, iha edifísiu BTL, E.P Covalima.
Enkontru ne’e, hodi fó motivasaun ou nafatin enkoraja funsionáriu sira no husu ba sira atu kontinua halo servisu tuir regra, hodi serví povu liuhosi fornesimentu bee moos ba populasaun sira.
Hafoin remata enkontru ne’e, Prezidente KE BTL, E.P ho ekipa kontinua monitoriza projetu konstrusaun fornesimentu sistema bee moos no projetu pakote supply & installation prefabricated liner tank inklui fence (capacity -60m3 1 unit, capacity-100m3 4 unit & capacity-180m3 1 unit) ne’ebé implementa hela iha postu administrativu Zumalai,
Atividade monitorizasaun ne’e, hodi observa direta obra fíziku ne'ebé la'o hela iha terrenu no atu hatene progresu servisu ne'e rasik nomos hodi garante kualidade projetu refere, nune'e wainhira finaliza, bele fó benefísiu ba abitante sira to’o tempu naruk.
Durante atividade monitorizasaun iha terrenu, Ezekutivu BTL, E.P husu ba kompañia kontratór sira atu aselera lalais obra fíziku, nune'e bele fornese ona bee moos ba abitante sira.
Enkuantu projetu konstrusaun fornesimentu sistema bee moos ne'e, implementa hosi kompañia Mamatelu TunivaUnip Lda ho totál kustu $ 419,349.04. Enkuantu projetu pakote supply & installation prefabricated liner tank inklui fence ezekuta hosi kompañia Bia Basan Mogen Unip Lda ho orsamentu hamutuk $ 289,681.96.
Projetu konstrusaun sistema bee moos, obra fíziku atinji ona 100%, sei falta servsiu adisionál, hodi kompleta enkuantu projetu pakote fornesimentu no instalasaun tanke rezervatóriu nian, ream beam no lutu finaliza ona, sei falta instalasaun tanke, tanba tanke sosa iha estranjeiru, nune'e seidauk halo instalsaun, tuir informasaun hosi kompañia kontratór katak, fulan ida tan tanke hirak ne'e to'o ona iha Timor-Leste.
Entretantu projetu hirak ne'e wainhira remata sei monta mos metru kontadór unidade 630 ba uma kian sira no sei benefisia ba populasaun 3.780 inklui sei fornese mos bee moos ba repartisaun Estadu nian 10, hanesan postu saúde, igreja no eskola sira.
Fahe ba Sosial Media:
