Díli, 20/03/2025. Prezidente Komisaun Ezekutiva (KE) Bee Timor-Leste Empreza Públika (BTL, E.P), Sr. Gustavo da Cruz, partispa iha programa 𝑇𝑎𝑙𝑘 𝑆ℎ𝑜𝑤, ne’ebé organiza hosi Plataforma Nasionál Bee, Saneamentu no Ijiene Timor-Leste (PN-BESI-TL), iha stúdiu RTTL, E.P, Caicoli.
Objetivu hosi programa 𝑇𝑎𝑙𝑘 𝑆ℎ𝑜𝑤 ne’e, hodi deskute kle’an entre parte interesada sira ne’ebé hala’o papel iha bee no saneamentu nian, hodi bele identifika progresu no dezafiu sira inklui reforsa kooperasaun no koordenasaun servisu ne’ebé mútua no integradu nomos rezulta planu prioridade, hodi bele dezelvolve setór bee ho di’ak liu tan nune'e mos diskusaun ne’e, hodi kontinua hafanun públiku kona-bá importánsia hosi bee ne'e rasik.
Iha diskusaun ne'e, Prezidente K.E BTL, E.P destaka, ezisténsia BTL hanesan empreza públika ne’ebé hatuur ho dekretu lei nú. 41/2020 ho ninia knaar atu lori bee ba populasaun tomak iha territóriu nasionál ho kualidade, sustentavel no kuantidade ne’ebé di’ak, tuir metas ne’ebé sita iha PEDN 2011-2030 katak to’o tinan 2030, sidadaun hotu-hotu bele asesu ona bee ho adekuadu, kualidade no sustentavel.
Alen de ne’e, Ezekutivu BTL, E.P esplika kle’an papel esensiál empreza públika ne’e nian nomos atinjimentu, obstákulu no polítika ou esforsu BTL, E.P nian ba futuru, oinsá atu implementa planu importante sira, hodi liberta populasaun sira iha territóriu nasionál, liuhosi setór bee no saneamentu, liu-liu área urbana hanesan kapitál postu-administrativu sira, kapitál munisípiu no nasionál maibé la taka dalan ba área rurál sira.
Realizasaun programa 𝑇𝑎𝑙𝑘 𝑆ℎ𝑜𝑤 ne’e, hodi selebra Loron Mundiál Bee nian ne’ebé datada iha loron 22 fulan marsu ne’e, ho tema globál mak “𝐺𝑙𝑎𝑐𝑖𝑒𝑟 𝑃𝑟𝑒𝑠𝑒𝑟𝑣𝑎𝑡𝑖𝑜𝑛” no tema nasionál “𝐾𝑜𝑛𝑠𝑒𝑟𝑣𝑎 𝐵𝑒𝑒 ℎ𝑜𝑑𝑖 𝐻𝑎𝑏𝑢𝑟𝑎𝑠 𝐸𝑘𝑜𝑠𝑖𝑠𝑡𝑒𝑚𝑎”.
Oradór iha programa 𝑇𝑎𝑙𝑘 𝑆ℎ𝑜𝑤 ne’e, hosi DNRAS, BTL, E.P no PN-BESI-TL rasik.
Fahe ba Sosial Media:
