Díli, 20/01/2023, Prezidente Komisaun Ezekutiva (KE) Bee Timor-Leste, Empreza Públika (BTL, E.P) Eng. Carlos Peloi dos Reis, partisipa iha programa Grande Entrevista hodi ko’alia kona-bá “Lamentasaun Públiku ba Atendimentu Bee iha Timor-Leste (TL)”, ne’ebé realiza iha loron 19 fulan janeiro tinan ne’e, iha estúdiu sentrál GMNTV, Bebora, Díli.
Durante iha entrevista ne’e, Prezidente KE BTL, E.P hatete servisu hirak ne’ebé BTL, E.P konsege realiza ona durante tinan 2022, mak iha pontu tolu ne’ebé BTL, E.P fó prioridade hanesan, halo operasaun no manutensaun ba sistema bee no saneamentu ne’ebé ezistente hodi garante nia funsionamentu ba komunidade sira, promove projetu sira liuhosi halo melloramentu ba sistema bee ne’ebé eziste no sistema foun, ba iha área hirak ne’ebé mak komunidade sira seidauk asesu ba servisu fornesimentu bee moos. Ikus liu mak foku ba rekolla reseitas hodi apoia ba servisu sustentabilidade bee no saneamentu nian. Nomos projesaun tarefa ba tinan 2023 nian.
Iha parte operasaun no manutensaun nian, BTL, E.P halo jestaun ba sistema bee iha munisípiu 11 la inklui RAEOA. Hosi sistema hirak ne’e, BTL, E.P konsege jere rezervatóriu 80 resin, bomba 71 iha kapitál postu, bee superfísie 26 nomos sistema desalinizasaun iha Metinaro ne’ebé antes ne’e hetan apoiu hosi Parseiru sira, alende ne’e, BTL, E.P mos halo jestaun ba sistema saneamentu ba tratamentu bee foer iha Tibar.
Enkuantu iha parte promosaun ba projetu melloramentu no projetu foun sira, iha tinan 2022, BTL, E.P konsege promove projetu hamutuk 180 resin. Hosi totál projetu hirak ne’e, projetu balun kontinuasaun hosi projetu ezistente hosi Diresaun Jerál Bee no Saneamentu (DGAS, sigla portugés) nia tempu, inklui projetu foun balun ne’ebé BTL, E.P rasik mak promove, iha 24 kapitál postu nomos iha suku tolu.
Alende ne’e, projetu hirak ne’ebé promove iha tinan kotuk (2022), barak mak la’o hela iha terrenu (ongoing). Enkuantu projetu ne’ebé mak BTL, E.P jere hosi DGAS no projetu entre liña ministeriál sira, hamutuk 75, hosi númeru ne’e, projetu 40 resin mak konklui ou finaliza ona ho 100% no fornese ona ba komunidade sira, enkuantu projetu 12 mak implementa hela ina terrenu (ongoing). Projetu hitu mak iha retensaun, projetu 13 mak obrigatoriamente tenke taka, tanba laiha progresu ou kompañia implementadór sira abandona servisu. Alende ne’e, BTL, E.P mos jere projetu balun entre liña ministeriál nian, ne’ebé finansia hosi Fundu Infraestrutura (FI) nian, hamutuk 24, balun hosi DGAS nian nomos iha projetu haat BTL, E.P rasik mak promove. Projetu hirak ne’e, kategoria ba projetu emerjénsia, tanba hetan estragus iha kalamidade loron 4 fulan abril tinan 2021. Hosi projetu emerjénsia ne’e balun mos finaliza ona, balun iha retensaun no balun sei iha faze DED.
Ezekutivu mos rekoñese katak, populasaun barak iha Díli no munisípiu sira seidauk asesu ba bee moos, maibé komparasaun progresu servisu entre antes ne’e iha DGAS no BTL, E.P iha diferensa, maske seidauk atinji 100%, maibé iha rezultadu di’ak no fó impaktu pozitivu. Tanba liga ba komunidade barak mak seidauk asesu ba bee moos, fatór ida mak laiha kooperasaun ne’ebé di’ak hosi komunidade sira, tanba komunidade balun kontinua halo ligasaun ne’ebé la tuir padraun (koneksaun bee ilegál nomos uza sanyo hodi dada bee), nune’e hamenus presaun bee, hodi afeta ba komunidade balun labele hetan bee, maibé BTL, E.P nafatin esforsu, hodi halo melloramentu ba sistema hirak ne’e, hodi garante ema hotu-hotu, katak to’o loron ida komunidade bele hetan bee, maibé presiza mos kooperasaun hosi komunidade, tanba ne’e, Ezekutivu husu ba komunidade sira hodi koopera, atu evita halo konesaun bee ho ilegalmente.
Liga ba reseitas durante iha 2022, BTL, E.P konsege rekolla reseitas rihun atus neen resin ($ 600.000 resin), liu alvu ou tarjetu ne’ebé mak VIII Governu impoin ba BTL, E.P. tanba alvu ne’ebé VIII Governu fó ba BTL, E.P mak Rihun atus rua lima-nulu ($ 250.000), katak liu alvu ne’ebé Governu fó, maibé Ezekutivu hatete, reseitas ne’e la sufisiente hodi utiliza ba operasaun no manutensaun nian, tanba kustu ba operasaun no manutensaun boot liu, ida ne’e la inklui promove projetu sira.
Ho nune’e, atu komunidade hot-hotu bele asesu bee, BTL, E.P nafatin halo jestaun ba servisu melloramentu sistema bee ezistente sira ne’e, enkuantu komunidade sira atu bele asesu ba bee moos, mak daudaun ne’e BTL, E.P prepara hela dezeñu kona-bá sistema bee moos, wainhira finaliza ona faze dezeñu ne’e, bele hakat ba nia implementasaun, nune’e to’o tinan 2027 ou 2028 bee bele to’o ba ema hotu, maibé atu to’o iha alvu (tarjetu) ne’ebé mak iha mak presiza kontribuisaun hosi parte hotu-hotu.
Fahe ba Sosial Media:
