Díli, 06/06/2023. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, partisipa iha konsultasaun kona-bá Pré-Lansamentu ba Revizaun Kapitál Umanu (HCR sigla inglés) Timor-Leste (TL), ne’ebé realiza iha salaun enkontru Banku Mundiál, Bidau Lecidere, Díli.
Reuniaun ne’e organiza hosi Banku Mundial ho objetivu hodi halo konsultasaun, nune’e atu hetan feedback/komentáriu no rekomendasaun balun hosi stakeholder ou partisipante sira, ligadu ho pré-lansamentu HCR.
Durante iha sesaun ne’e, iha mos aprezentasaun hosi ekipa Banku Mundiál nian via video konferénsia kona-bá konkluzaun prinsipál hosi relatóriu ne’e. No iha mos sesaun perguntas no resposta, iha ne’ebé entidade governu nian ne’ebé partisipa iha sorumutu refere, bele hato'o komentáriu, sujestaun ou ideia nomos levanta kestaun ruma relasiona ho HCR, ho nia rezumu no aprezentasaun. Sesaun interativa ne’e, sai hanesan diskusaun frutífera no sei garante katak feedback stakeholder nian ne’e útil, hodi akumula hamutuk, atu alkansa objetivu kona-bá avaliasaun kapitál umanu TL. Alende ne’e, durante iha aprezentasaun ne’e parte BM rekomenda pontu importante balun ne’ebé presiza tau atensaun no atu hadi’a.
Alende hetan feedback hosi governu nian, Banku Mundial sei solisita/husu mos opiniaun balun hosi grupu sira ne’ebé selesionadu ou konsidera hanesan parseiru dezenvolvimentu. No Banku Mundial mos partilla ou hato’o esbosu relatóriu HCR ba S.E Prezidente Repúblika, no informa mos kona-bá prosesu hetan feedback hosi parte governu nian, liu-liu iha nível téknika nian, hosi ministériu relevante sira, kona-bá HCR ne’e rasik.
Entidade sira ne’ebé partisipa iha reunaiun ne’e, mai hosi Ministériu Ensinu Superiór, Siénsia no Kultura (MESCC), Ministériu Turizmu, Komérsiu no Indústria (MTCI), Ministériu Edukasaun, Juventude no Desportu (MEJD), Unidade Misaun Kombate Stunting (UNMICS, sigla portugés), BTL, E.P no Banku Mundiál rasik no partisipante sira seluk tan.
Fahe ba Sosial Media:
