Díli, 27/06/2024, Prezidente Komisaun Ezekutiva BTL, E.P, Eng. Carlos Peloi dos Reis, Diretór O&M BTL, E.P, Aleixo dos Santos, akompaña S.E Sekretáriu Estadu Eletrisidade Bee no Saneamentu , Santos Noronha, ho ekipa partisipa serimónia inaugurasaun sistema bee moos, iha Aldeia Terus Nain, Suku Villa Verde, Postu Administrativu Vera Cruz.
Sistema kanalizasaun ne’e, inisiativa husi komunidade sira, hela iha Aldeia Terus Nain, kordena malu halo kontribuisaun finanseiru, hodi sosa material hanesan kanu no sasan sira seluk, konstrui mos tanke rezervatóriu.
Wainhira komunidade sira lori kontribuisaun sosa material, installa hotu, maibé bee seidauk to’o komunidade sira nia hela fatin, nune’e komisaun organizador ba konstrusaun sistema bee moos ida ne’e, halo pedidu mai BTL, E.P, hodi fo apoia material.
Hafoin simu pedidu ne’e, Ezekutivu BTL, E.P aprova pedidu ne’e, hodi apoia kanu installa ba fatin tolu, ne’ebé pertense ba Aldeia Terus Nain.
Durante ne’e, abitante sira asesu bee difisil, nune’e obrigadu tenki la’o dook maka foin bele kuru bee, maibé ho inisiativa husi komunidade ne’e, bee konsege too ona iha sira nia leet.
Iha serimónia inaugurasaun ne’e, autoridade lokál no komunidade sira, hatoo agradesimentu ba governu, tamba bele liberta ona sira, hodi asesu ba bee moos.
Iha fatin hanesan, S.E Sekretáriu Estadu Eletrisidade Bee no Saneamentu , Santos Noronha, husu ba populasaun sira, atu kuidadu sistema bee moos ida ne’e, hodi bele dura ba tempu naruk.
‘ Ita hotu hatene, bee nu’udar esensial tebes ba ita ema, tamba ne’e komunidade ho konsiensia hodi kuida fasilidade sira no mos asegura nafatin bee matan, hodi labele fo impaktu ba rekursu bee iha rai okos”.
Benefisiariu ba sistema kanalizasaun ne’e, uma kain hamutuk 86 ho nia populasaun kuaze atus neen.
Fahe ba Sosial Media:
