Díli, 07/10/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz enkontru ho Reprezentante Rezidente Grupu Banku Mundiál nian iha Timor-Leste (TL), Sr. David Freedman ho misaun ida ho naran Country Programming Consultations hosi Grupu Banku Mundiál nian (WBG, sigla inglés). Enkontru ne’e, realiza iha sala reuniaun Ezekutivu BTL, E.P, Caicoli.
Sorumutu ne’e, hodi halo konsultasaun kona-bá atinjimentu BTL, E.P nian durante tinan lima nomos planu investimentu setór bee nian ba futuru, tantu iha área urbana no rurál sira, inklui reseitas ne’ebé BTL, E.P kobre durante ne’e. Ho informasaun hirak ne’e, parseiru Grupu Banku Mundiál kontente no apresia tebes ho progresu BTL, E.P nian.
Alen de ne’e, parte rua (BTL, E.P no WBG) destake mos kona-bá planu prioridade ba tinan 2026 nian. Ezekutivu BTL, E.P relata, planu investimentu bee ne’ebé la’o hela, liu-liu dezeñu DED ba munisípiu neen no implementasaun projetu bee iha kapitál postu sira nomos ba kapitál munisípiu rua hanesan Lautém no Manufahi ne’ebé iha faze atu hakat ba implementasaun inklui planu investimentu ba Díli Leste, Díli Oeste, Baucau no Viqueque.
Iha biban ne’e, pronunsia mos katak, parseiru WBG sei tenta hodi halo aprezentasaun no diskusaun ho Ministériu Finansas (MF) kona-bá programa no modalidade finanseira.
Relasiona ho finansiamentu sira, Ezekutivu BTL, E.P esplika, ida ne’e papel Governu/MF nian, enkuantu BTL, E.P haree de’it ba prosesu tékniku sira bazea ba planu negósiu BTL, E.P nian ne’ebé traxa ona no BTL, E.P hein de’it resposta ou desizaun hosi Governu/MF kona-bá investimentu ba setór bee no saneamentu, maibé ba kestaun téknika BTL, E.P prontu, atu bele asegura finansiamentu hosi parseiru sira ne’ebé mak tuir Governu/MF katak, viavel duni atu utiliza ba setór ida ne’e.
Durante iha diskusaun ne’e, parseiru Grupu Banku Mundiál komprometidu, atu nafatin apoia iha setór bee no saneamentu ba futuru.
Fahe ba Sosial Media:
