Manufahi, 22/08/2023, Prezidente Komisaun Ezekutiva BTL, E.P, Eng. Carlos Peloi dos Reis, sai oradór iha semináriu Revizaun ba Planu Estratéjia Bee Saneamentu no Ijiene, ne’ebé hala’o salaun Ingreja Manufahi, iha munisípiu Manufahi.
Iha opornuidade ne’e, Prezidente K.E BTL, E.P fahe informasaun kona-bá servisu BTL, E.P, liu-liu polítika BTL, E.P nian, atu bele aselera prosesu dezenvolvimentu iha área setór bee no saneamentu.
Ho polítika ne’ebé iha, BTL, E.P tau preoridade liu ba Postu Administrativu sira, ne’ebé fora husi kapitál munisípiu sira, tamba ne’e BTL, E.P kompremitidu hodi promove projetu sira iha postu administrativu sira iha territóriu nasionál, ne’ebé konsege kobre ona postu administrativu tolu nulu resin, nune’e mos postu administrativu sira seluk, balun iha hela prosesu aprovizionamentu no dezeñu detalladu.
Oinsa ba parte kapitál munisípiu nian, dadaun ne’e munisípiu Baucau, Viqueque, Lautém, Manufahi no Díli fahe ba parte rua, Leste no Oeste, ne’ebé prosesu agora iha ona Komisaun Nasionál Aprovizionamentu (CNA), hodi bele anunsiu tenderizasaun ba projetu melloramentu sistema bee moos iha munisípiu hirak, ne’ebé mensiona iha leten.
Nune’e mos ba munisípiu sira seluk, prosesu planu mestre remata ona, ba tinan ne’e sei kontinua halo dezeñu detalladu, ne’ebé iha previzaun katak sei finaliza iha tinan ne’e, hodi nune’e tinan oin bele implementa ona projetu melloramentu sistema bee moos.
Ba projetu melloramentu sistema bee moos iha kapitál munisípiu konsidera bee moos, ne’ebé hetan tratamentu di’ak no kualidade, tamba ne’e bee to’o uma sei bele hemu direta, maibé ba postu administratvi sira, bele moos to’o uma, maibé seidauk bele hemu, tan ne’e molok atu hemu tenki nono bee maka foin bele konsumu.
BTL, E.P durante ne’e laos foku liu ba kapitál munisípiu no postu de’it, maibé Suku no Aldeia sira ne’eb’e seidauk asesu bee moos, konsege promove projetu balun no mos apoia material ba komunidade sira hodi kanaliza bee.
BTL, E.P mos durante ne’e servisu hamutuk ho parseiru internasionál no nasionál hanesan WaterAid, JICA, Plan, CVTL no mos sira seluk tan, halo koperasaun servisu di’ak tebes, hodi kanaliza bee ba komunidade sira, liu-liu iha área remotas.
BTL, E.P ho nia funsionáriu tékniku sira husi nasionál to’o iha munisípiu loron-loron mellora sistema bee moos ezistente, hodi bele garante nafatin fornesimentu bee moos ba komsumidór sira.
Iha semináriu ne’e, partisipa husi reprezentante Sekretáriu Estadu Eletrisidade Água no Saneamntu, Xefe Gabinete, Administradór Munisípiu Manufahi, Administradór Postu Administrativu sira, Xefe Suku, parseiru internasionál, nasionál no mos partisipante sira seluk.
Fahe ba Sosial Media:
