Manatuto, 30/06/2022. Prezidente Komisaun Ezekutiva BTL, E.P, Eng. Carlos Peloi dos Reis, akompaña husi Jestór MRP, koordenadór Manatuto ho nia ekipa, nomós reprezentante Administradór munisípiu Manatuto, Administradór Postu -Administrativu Soibada, halo lansamentu ba projetu konstrusaun sistema Fornesimentu bee moos, ne'ebé realiza iha edifisíu Administrasaun Postu-Administravu Soibada.
Iha serimónia lansamentu ne'e, Prezidente K.E BTL, E.P husu ba autoridade postu, xefe suku no komunidade sira hotu, atu kolabora ho BTL, E.P no k ompañia implementadór, nune'e projetu bele finaliza tuir termu kontratu, ne'ebé estabele ona.
Líder maxímu BTL, E.P afirma, katak BTL, E.P, nia parte mak oinsa atu haree liu ba tékniku nian, hodi bele aselera prosesu obra refere, la'o ho di'ak no husi autoridade postu-administrativu no suku mak haree ba parte sosiál nian, nune'e bee moos bele mai lalais iha komunidade nia leet.
Prezidente husu mós ba autoridade, komunidade sira hotu, perante projetu fizíku ne'e la'o, to'o remata mós, sei persiza nafatin ema hotu nia kontribuisaun no kolaborasaun, hodi bele kuidadu nafatin sistema bee moos ne'e, atu nune'e bele utiliza ba tempu naruk.
Administadór Postu-Administrativu Soibada sente haksolok no agredese ba VIII governu konstitusionál, ne'ebé iha polítika di'ak konsege implementa projetu bee moos ne'e.
Líder postu ne'e husu ba nia komunidade sira atu bele kolabora, hodi labele impede projetu ne'e iha dalan klaran. Administadór ne'e, kompromete sei akompaña servisu hirak ne'e, hodi bele lori bee hakbesik mai komunidade sira, tamba tinan barak ona, difísil tebes ba sira atu asesu ba bee moos.
Projetu konstrusaun sistema bee moos ne'e, benefisia ba uma kain 280, ho nia populasaun hamutuk 1,680. Orsamentu ne'ebé gasta ba obra refere, hamutuk dollar Amerikanu 772,944.46, ho durasaun tempu fulan neen. Iha serimónia lansamentu ne'e, partisipa husi Diretór SMASA, Amu Pároku Parókia Soibada, autoridade seguransa, komunidade no estudante sira.
Fahe ba Sosial Media:
