Manatuto, 18/11/2022, Prezidente Komisaun ezekutiva BTL, E.P, Eng. Carlos Peloi dos Reis, akompaña hosi Jestór ba Peskiza, Projetu no GIS BTL, E.P ho ekipa, hamutuk Autoridade sira, lansa projetu melloramentu sistema fornesimentu bee moos, ne’ebé realiza iha Suku Cribas Postu Administrativu Manatuto, Munisípiu Manatuto.
Prezidente K.E BTL, E.P hatete, politíka VIII governu konstituisionál tau prioridade ba setór bee no saneamentu, ne’ebé kada tinan governu apoia investe orsamentu kuaze milaun 36, wainhira Instituisaun Bee Timor-Leste Empreza Públika harii, governu nafatin aloka orsamentu, hodi dezenvolve setór bee no saneamentu, hanesan iha tinan 2022 governu aloka tan milaun 17 no iha 2023 aloka tan milaun 18.
Alende ne’e mos governu nia esforsu, mobiliza rekursu externa, husi parseiru dezenvolvimentu sira, ne’ebé to’o agora mobiliza milaun 720 hodi investe iha bee no saneamentu. Ho orsamentu hirak ne’e saida mak BTL, E.P aproveita mak rekursu ne’ebé governu tau nomos externa, hodi bele lori bee no saneamentu ba komunidade sira.
Prezidente ne’e partilla informasaun esforsu BTL, E.P katak, politíka ba kapitál Munisípiu sira, hanesan iha Munisípiu Baucau, Viqueque, Manufahi no Lautém no Díli dezeñu detalladu hotu ona, orsamentu ba projetu hirak ne’e, aseguradu ne’ebé apoia mai husi duador sira, hamutuk orsamentu kuaze milaun 720, ne’ebé sei finansia ba projetu sira, ne’ebé sei implementa munsípiu sira temi ona iha leten, tamba ne’e espera tinan oin, bele hakat ona ba prosesu tenderizasaun, hodi bele implementa ona projetu ne’e.
Enkuantu ba munisípiu sira seluk, prosesu planu mestre kuaze finaliza hotu ona, nune’e iha tinan oin, bai ha faze dezeñu detalladu remata iha 2023, nune’e iha 2024 bele anunsiu ona tenderizasaun, hodi implementa projetu ne’e.
Nune’e mos investimentu iha kapitál Postu Administrativu sira, mak governu aloka orsamentu ba BTL, E.P, hodi investe ka halo melloramentu ba sistema bee moos, iha ne’ebé projetu BTL, E.P fizíku la’o dadaun iha terrenu (ongoing) iha postu sia (9), nune’e mos ba postu rua nulu resin haat (24) , dadaun ne’e iha hela faze tenderizasaun, ba postu sanulu resin hitu (17), mak iha prosesu dezeñu detalladu no postu hitu tan mak persija ba halo levantamentu dadus, tamba ne’e BTL, E.P nia esforsu ka tarjetu ba fim do ano ida ne’e, sei lansa projetu hotu ba postu kapitál, nune’e ba tinan oin, konsentra de’it ba mellora sistema bee moos.
Iha oportunidade ne'e mos, Prezidente K.E BTL, E.P agredese ba IPG, I.P nia esforsu, ne'ebé halo Estudu ida kle'an hodi identifika bee iha rai okos no halo perfurasaun, hodi responde ba komunidade sira nia nesesidade lor-loron
Diretór SMASA Manatuto Matias Soares, nu’udar reprezentante Administradór Munisípiu Manatuto, husu ba komunidade sira iha Suku Cribas, atu kontribui ba prosesu implementasaun Projetu ne’e la’o hodi;ak, hodi bele finaliza tuir tempu, ne’eb’e mak estabele ona.
Reprezentante ne’e afirma, Suku Cribas iha previlejiu bo’ot liu, tamba governu liu husi BTL, E.P, bele mellora ona sistema bee moos, tamba tinan naruk, komunidade sira, susar asesu ba bee moos.
Administradora Postu Administrativu Manatuto, Clara de Carvalho Ximenes hatete, agredese ba BTL, E.P, tamba ne’e komunidade sira iha konsiensia hodi kolabora atu servisu hamutuk kompañia no BTL, E.P.
Projetu Melloramentu Sistema Bee Moos ne’e, sei finansia ho totál orsamentu rihun atus-rua lima-nulu resin-lima atus-lima ualu-nulu resin-lima ho sentavos sia-nulu resin-lima ($ 255,585.95).
Iha serimónia lansamentu ne’e, partisipa hosi Diretór IPG, I.P, autoridade seguransa, Autoridade lokál, komunidade sira nomos partisipante sira seluk.
Fahe ba Sosial Media:
