Díli, 15/06/2022. Prezidente Komisaun Ezekutiva BTL, E.P, Eng. Carlos Peloi dos Reis, hetan konvite husi Sosiedade Sivíl Luta Hamutuk, hodi bele partilla informasaun kona-bá polítika iha setór bee no saneamentu.
Atividade ne’e, realiza tamba Luta hamutuk halo monitorizasaun iha fatin balun, ne’ebé konsege identifika área balun, komunidade sira halerik ba bee moos, liu-liu iha munisípiu Díli, hodi bele rona direta esplikasaun ruma husi Prezidente Komisaun Ezekutiva BTL, E.P.
Diretór luta Hamutuk relata mós komunidade balun ne’ebé halo ligasaun ilegál no utiliza DAP iha fatin-fatin, ne’ebé fó impaktu ba komunidade sira seluk, dala ruma la asesu ba bee moos.
Iha oportunidade ne’e, Prezidente K.E BTL, E.P, halo intervensaun hodi bele partilla informasaun oitoan kona-bá prosesu servisu sira, ne’ebé BTL, E.P konsege implementa ona, no servisu hirak ne’ebé sei iha prosesu nia laran.
Prezidente K.E BTL, E.P hatan ba asuntu hirak ne’e katak, kona-bá servisu iha Díli, ekipa kontinua servisu halo melloramentu ba Sistema sira tuan, nune’e bele responde ba komunidade sira nia preokupasaun.
Alende ne'e, BTL, E.P mós iha polítika rasik, hodi promove projetu sira hanesan, projetu ba kapitál, postu-administrativu no área rurál sira.
Prezidente K.E BTL, E.P agredese nafatin ba parseiru sira, husi Ajénsia Internasionál hanesan ADB, Banku Mundiál, MCC no parseiru sira seluk nia servisu hamutuk, ne’ebé ho objetivu ida de’it atu dezenvolve di’ak liu tan setór bee moos, saneametu no drainajen sira iha Timór laran tomak.
Líder maxímu BTL, E.P ne’e, mós husu ba partisipante sira, atu bele kontribui em termos informasaun no ajuda sosializa informasaun ba komunidade sira, nune’e bele utiliza Sistema bee moos sira, ne’ebé dadaun ne’e eziste hela.
Partisipa iha atividade diskusaun no fahe informasaun ne’e mak Diretór Luta Hamutuk, Funsionáriu Luta hamutuk no mós estajiáriu sira. Atividade ne’e rasik realiza iha salaun enkontru Luta Hamutuk, Farol, Díli.
Fahe ba Sosial Media:
