Díli, 08/02/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis, enkontru ho ekipa PN-BESI TL, iha salaun enkontru Ezekutivu, edifísiu sentrál BTL, E.P, Caicoli, Díli.
Objetivu hosi enkontru ne’e, mak parte PN-BESI TL mai aprezenta relatóriu hosi atividade auditoria sosiál ne’ebé mak PN-BESI TL implementa iha terrenu durante tinan ida. Nomos hanesan meius ida, atu hametin liu tan liña koordenasaun nomos servisu hamutuk entre BTL, E.P no PN-BESI TL, liu-liu hodi haree kona-bá kestaun bee moos.
Enkuantu relatóriu hosi atividade auditoria sosiál ne’e, PN-BESI TL deskobre ou identifika liuhosi intervensaun ou servisu ne’ebé PN-BESI TL rasik implementa ona durante tinan ida, iha munisípiu Viqueque, Ermera no Aileu, liu-liu informasaun kona-bá identifikasaun problema sosiál sira iha munisípiu tolu ne’e, hanesan komunidade sira nia asesu ba bee moos. Alende ne’e, liuhosi atualizasaun ba informasaun sira kona-bá kestaun bee moos ne’e, bele apoia BTL, E.P atu bele halo intervensaun no maximiza volume servisu, hodi halo atendimentu ba komunidade ho di’ak iha setór bee moos.
Hafoin aprezentasaun relatóriu, Prezidente KE BTL, E.P agradese no apresia tebes ba PN-BESI TL ne’ebé regularmente nafatin atualiza informasaun sira ne’ebé mak PN-BESI TL rasik deskobre ou identifika iha terrenu liga ba kestaun bee. Tanba liuhosi informasaun sira ne’e, bele tulun BTL, E.P hodi asegura BTL, E.P nia servisu, liu-liu atu bele fornese bee moos ba komunidade sira.
Fahe ba Sosial Media:
