Baucau,01,Abril 2026-Vise-Prezidente Komisaun Ezekutiva (KE) BTL, E.P ba Asuntu Tékniku, José Filipe Ximenes Smith, hamutuk ho Vise-Prezidente KE BTL, E.P ba Asuntu Korporativu, Manuel Tomas Amaral de Carvalho, no Diretór Enjenaria no Investimentu (DEI),João da Cruz Cardoso, jestór insfraestrutura, no koordenadora BTL, E.P Munisípiu Baucau, halo sosializasaun ba Autoridade Lokal, lideransa komunitaria no komunidade iha Suku Fatulia Postu Administrativu Venilale Munisipiu Baucau tersa semana ne'e.
Objetivu hosi atividade ne’e mak atu partila informasaun kona-ba implementasaun projetu konstrusaun sistema bee moos foun iha Postu Venilale, molok kompanhia manan na’in implementa projetu ne’e iha tempu besik.
Durante sosializasaun ne’e, Vise-Prezidente KE BTL, E.P ba Asuntu Tékniku husu ba Autoridade Lokal no lideransa komunitariu, Veteranu, Komunidade no parte relevante sira hotu atu servisu hamutuk hodi fo apoiu ba projetu ne’e. Nune’e, implementasaun projetu sistema bee moos bele lao ho diak to’o finalizasaun, no la iha impedimentu ruma.
Alende ne’e, Vise-Prezidente BTL, E.P. ba Asuntu Korporativu apela ba komunidade sira atu labele laran susar kona-ba konstrusaun sistema bee ne’ebe sei kobre area iha suco tolu. Nia hateten katak projetu ne’e sei fo benefísiu direta ba uma kain 1,000 iha suku tolu (benefisiariu hamutuk 6,000), no sistema bee bee moos ne’e sei hakman komunidade nia halerik ba bee no hadi’a qualidade moris.
Maibé, nia mos klarifika katak projetu ne’e sei la kobre hotu komunidade sira iha suku tolu ne’e liu-liu sira ne’ebé hela dook. Nia mos sublinha katak objetivu projetu mak atu responde nesesidade baziku ba bee moos iha área ne’ebé defini ona hanesan prioridade, no BTL sei kontinua buka alternativa ba área seluk iha futuru.
Iha okaziaun sosialisasaun ne’e, parte BTL, E.P. prepara akta konkordansia ida hodi asina hamutuk ho Autoridade Lokal. Akta ne’e mak prova aseitasaun no kompromisu ba implementasaun projetu sistema bee moos iha PA Venilale nuudar parte esensial ba kolaborasaun entre instituisaun estadu nian ho lideransa komunitaria no komunidade.
Fahe ba Sosial Media:
